وخشت جنات : احمم
سفيان متحركش وكمل يشرب في قهوته ..أما البنت التفتت على صوت جنات
جنات : صباح الخير 
البنت : صباح النور
جنات منحرجة ومش عارفة هذه من ..وسفيان مش مدورها تعرف او لا
جنات : وو وين صالحة وملاك
البنت : مشوا يسلموا على ماما وخويا
جنات ابرمت ودارت روحها اتصب في مية : ننننن
البنت ردت تحكي مع سفيان وتضحك ..وسفيان قاعد يسمعلها ..وفايت جنات …وهيا عصبت منهم
البنت مش سمحة واجد بس من النوعية المهتمة بروحها بزيادة ..اظافرها لابستها ..بنة عطرها القوية…وجها من كثر الاهتمام لعند يلمع ..ولا غلطة 
جنات طلعت من المطبخ ومشت قمعزت على سفرة الفطور ..معصبة وحطت اعصابها في الخبز …تأكل وتهزب ودايرة عركة بروحها 
بعد شويا خشت صالحة ..من الجنان
صالحة : صباح الخير
جنات : صباح النور 
صالحة بحتت فيها زين واستغربت ليش قالبة وجهها ..ومشت خشت للمطبخ ولعت الغاز على الشاهي
وجابت باقي الفطور اتحط فيه على الطاولة : جنات تعرفتي على نصراء
جنات : من ..اي نصراء