جنات ابتسمت : ريتي جلال يما يطلع منه 
مودة : جنات ردي بالك اتقولي لجلال شي ..راه مش فاطن ومش عارف حاجة يحساب روحه متعارك مع شباب برا الحوش
جنات : أحسن باهي أنه مش عارف …أنتي عارفة علاقة جلال بخوالي مش تمام وكان يعرف شن دار عيسى امبارح اتصير مشكلة كبيرة وتقعد قصة
مودة : وهذا ليش خايفة أنا ..مانبيش مشاكل . تخيالي يسمعوها هلي 
جنات : باهي تمام ..خليني انكلم جلال نطمن عليه
مودة : اوكيه حتى انا نبي انصبي انساعد أمي ..اوكي
صكرت جنات وكلمت جلال ..وطلع زي ماقالت مودة مش متذكر شي …سالته جنات على سليمة قاللها أمس حست اشويا وجاء خالي عبدالعليم خذاها للحوشه ..وكمل احكايات امعاها عادي
بعد اطمنت جنات على خوها صبت خذت دووش البست فستان طويل ابيض وفيه ورد على اطرافه وفيه شريط على خصرها ..فستان بسيط وحلو .. وصلت وقمعزت فطرت ..بس كل تفكريها كان في سفيان 
بعد الغداء جت ملاك وافتحت الباب على جنات
ملاك : خييير 
جنات كانت مقمعزة تمشط في شعرها : اهلييين 
ملاك خشت : شن اخبارك
جنات : بخير الحمدالله
ملاك قمعزت على السرير : أمس طلعتي اتهبلي ..بنات عمي كلهم يسألوا عليك
جنات كملت وصبت : نجك ليا ..اعيونك ايهبلوا
ملاك صبت : هيا البسي وشاح وتعالي امعايا لوطى