المهم طلعت مودة وامها ..خشن للحوش كان الباب مردود ..خشن مافيش اي حس …أم مودة خشت جوا لدار سليمة ..ومودة مشت وين ماسيبت جلال وعيسى ايتعاركوا
مودة انفجعت من منظر جلال كيف مضروب وطايح على وجهه …مشت تجري وقمعزت احذاه قلبته على ظهره
مودة تضرب في جلال على وجهه بيدها تبيه يوعى : جلال ..جلال ..نوض 
جلال حرك راسه يبي يفتح اعيونه ومش قادر ..حط يده على وجه ايحك في اعيونه
مودة طبست عليه وخشمه دم : جلال أنتا اكويس شن اتحس
جلال أخيرا قدر يفتح اعيونه بحت في وجهها مودة ورفع يده حطها على خدها : مودة ..وين جنات
مودة مسكته من تحت كتفه واتحاول اتخليه ايقمعز : صبي جلال ..ساعدني
جلال ساعد مودة لعند قمعز واتكى على الساس ويبحت فيها ومستغرب شن جابها هنا
مودة سيبت جلال وعدت بسرعة طلعت لاقت أمها ادور في الحاجة سليمة برا في المطبخ والجنان
مودة : تعالي أمي اجديدة مش قاعدة ..جلال قال خذوها عيت خالي أمس
أم مودة : باهي الحمدالله ..قبل قلت العجوز وين راحت
مودة : أمي تعالي بحتي جلال شكله داير عركة ومضروب خشم وجه دم
أم مودة : هذا شكله جلال ..ديما مشاكل ..يستر الله
وخشن جوا شافن جلال ..أم مودة مسحت وجه بمية دافئة ومودة مشت طلعت دبش لجلال خش للمربوعة غير دبشه وخش رقد في مرقده