سفيان لابس اسود كامل وخذا عصاته ونزل لوطى ..تلاقى مع صالحة واخذا الفطور لجنات
سفيان نازل وقالب وجه على صالحة 
صالحة : صباح الخير 
سفيان ماردش عيها وكمل ينزل
صالحة : شيباني
سفيان عض على فمه وقف وبرم شورها : عدي شوفي شغلك ..وحسابك بعدين 
وكمل نزل معصب
صالحة : اوووفه ….نستاهل أنا اللي جبته لروحي 
ورقت مشت افتحت الدار على جنات لاقتها حايسة وتبرم في الدار
صالحة : صباح الخير
جنات : صباح النور
حطت السفرة وبحتت في جنات : كنك صايرة امعاك حاجة
جنات : اءاء ..لا غير كنت نستنى في تليفون ..اجديدة مريضة ونبي نطمن عليها
صالحة : إن شالله لاباس عليها ..أطمني إن شالله خير 
جنات ابتسمت بالغصب : إن شالله
صالحة مشت وتبي تطلع وجنات وقفتها : صالحة
صالحة : نعم
جنات : وو وين سفيان
صالحة : شفته طلع توا
جنات : باهي
طلعت صالحة وجنات مش عارفة ليش مشت تجري وافتحت الروشن وبحتت تحت ..وسفيان كان واقف تحت مع فخري ..سمع الروشن انفتح بحت فوق
وجنات برغم عارفة سفيان مايشوفش ..لكن خافت وخشت جوا 
سفيان حكى مع فخري والشاب امتاع الامن وكان يحكي ويشاور على روشن دار جنات ..وبعدها طلع مع فخري من المزرعة
********************
مودة طلعت من الدار ومشت حكت مع امها ..وقالتلها خلينا نمشوا انشوفوا اجديدة سليمة ..مرات تقعد مريضة وماحد جايب عنها علم