جنات قلبها وجعها : نجك ليا ..والله اكويس وطيب بس لو ايسيب السم اللي يشرب فيه 
مودة : جنات نبي انقولك حاجة 
جنات : كنك إن شالله خير
مودة : ع عيسى امبارح سيبته يضرب في جلال ومش عارفة شن صار فيه 
جنات صبت : حي عليا 
..حي عليا ..شن دارله هالحقير
مودة : والله ماني عارفة ..أنا خفت وهربت…وحتى النوم معرفتش نرقد وأنا انفكر ..وماقدرتش نتصل بيك تليفوني تكسر ..غير توا خذيت فون ماما
جنات حايسة في الدار : يانعليا ..كذا صكري انرن عليه
صكرت مودة وجنات اترن على جلال لكن فونه مقفل 
ردت اتصلت بمودة : حي عليا يا دودي نقاله مقفل
مودة اتفكر بعدها : ماتخافيش توا نمشي انشوفه
جنات : لا لا ردي بالك مرات الحيوان هذاك مازال قاعد
مودة : لا ماتخافيش عليا ..أمي حسها اتحوس برا نسمع فيها من بدري ..توا نطلع انقوللها من امس واجديدة سليمة مش باينة خلينا نمشوا انشوفوها
جنات : حتى هوا رائي ..بس افطني منه راه خامر ومعفن 
مودة : لا امي امعايا ماتخافيش عليا …هيا توا نطلع انشوف امي انشوف جلال وتوا نتصل بيك
جنات : نرجى فيك ..راكي تنسيني ..وردي بالك من روحك
*****************
سفيان طلع من جنات ..مشى لدار المصكرة ..خش قعد فيها اشوي ..وبعدها طلع مشى لداره خش الحمام فتح لامية الدافئة ..حول ادبشه وخش تحت الدش ..وكان كل فكره في جنات ..مش متذكر شي من لليلة امبارح ..الا أن جاء وفتح باب دارها
أما الباقي زي الحلم مش واضح …الشي الوحيد اللي عالق في باله ريحتها 
