سفيان قرب منها معصب : أنا شن قايل ياصالحة ..عليش محذركم في الحوش هذا …مانبيش حتى نسمع سيرتها …عليش تقهري في أمي وتحكي امعاها ..نبي نفهم ..تبيني انطربق الحوش هذا فوق روؤسكم والا كيف 
صالحة : باهي خلاص أخرة مرة والله العظيم ماعاد نفكر حتى فيها ..غير سامحني ..وراس خيي سفيان 
سفيان حط ايديه في شعره وتنهد : خلاص باهي أسكتي ..أسكتي وعدي اغسلي وجهك وارقدي
صالحة تمسح في وجهها : نجك ليا شيباني …وربي مافي كيفك
سفيان : هذة اخر مرة نحكي في الموضوع هذا …معاش نبي انعاود دوة فيه …لاني المرة الجاية حتى أنتي تلحقيها 
صالحة : باهي تمام 
سفيان : تصبحي على خير
وطلع من المطبخ ورقى فوق 
جنات اتبحت في سليم …كيف راقد ويبحت فيها بوجه البري ويبتسم 
سليم طفل من اطفال متلازمة داون …واللي مش عارفة شن معناها فهو طفل مغولي زي مافي ناس اتقول …بس أنا بصراحة مانحبش التسمية هذه …اسمهم أطفال متلازمة دوان
سليم راقد وكان واضح عليه المرض والتعب …جنات قربت منه وخايفة …هو ممكن عمره 12 او 13 سنة ..بس ديما اطفال الداون يعطوك عمر اصغر من اعمارهم الحقيقية لان أجسامهم ماتنموش كيفنا
كان صغير وضعيف …بس اعيونه حلوات نفس لون اعيون سفيان …شعره ناعم ونازل على وجه…بس طبعا ملامحه تعرفيه أنه طفل دوان 