جنات قلبها طاح في بطنها : كككيف شن قصدك 
سفيان قرب منها ومسكها مشى بيها لعند لباب افتحه وطلعها برا وقبل ايصكر الباب : ماتستعجليش ..كلها يومين وتعرفي كل شي 
صكر سفيان الباب قبل حتى ماتستوعب جنات كلامه …مشت لعند الدار تبي تفتحها ..الباب انفتح وطلعت صالحة وامعاها البنت المساعدة ..وشكلها كانت اتنظف في الدار ..وجنات استغربت لانها الدار ديما نظيفة وجنات مهتمة بيها
صالحة : ها شن اخبار رجلك تمام
جنات مازلت مصدومة من كلام سفيان : اااها ..اا تمام ..تمام
نزلت صالحة والبنت وجنات خشت للدار ..وقمعزت على السرير اتفكر في كلام سفيان …بس لافت نظرها ريحة في الدار غريبة ..زي ريحة النار ..بحتت جنات مافيش شي غريب ..
**********************
جلال تغداء من غداء أم مودة وطاح رقد لعند المغرب …وبعدها ناض غسل وجه ومشى طيب قهوة وطلع قمعز في الجنان ايدخن ..ويفكر في اللي صار أمس ..الذكريات مش واضحة …لكن كل مايغمض اعيونه ايشوف صورة مودة تبكي ..ومايعرفش ليش ؟!!!
جلال مازال قاعد ايفكر ..ويسمع مودة طالعة لاجنان وتحكي مع واحد من خوته لاصغار …نزل فنجان القهوة ومشى بسرعة نط على السور
جلال : مودة
مودة انفجعت وحطت ايدها على قلبها : فجعتني جلال 