جنات تبي تشرب قهوتها ..وفجعها صوت الكلب امخطم مع شاب الامن 
طاح منها الفنجان على فستانها ولاذعتها القهوة في نهاية ساقها صبت تنفض في القهوة من عليها : اااه 
صالحة : حي عليا حرقاتك 
ملاك
جنات رجلها تحرق فيها من القهوة وتمسح فيها ..فخري صبا وعدا بعيد ..وسفيان صبا وقرب منها : شن صار كنها
صالحة : ساهلة ساهلة ..مافي شي
سفيان بعصبية : شن صار فهموني ..كنها 
جنات اتبحت فيه معصب ومعاش عرفت خايف عليها ولا شنو
صالحة : مافي شي ..جنات انكبت عليها القهوة
سفيان : جنة أنتي اكويسة
جنات ساكتة 
سفيان : نسأل فيك ردي عليا ..أنتي اكويسة
جنات : اولا أسمي جنات ..مئة مرة انقولك أسمي جنات …وثانيا أنا اكويسة مافي شي 
سفيان مد يده : تعالي امعايا
جنات اتبحت فيه ومنصدمة ..وصالحة تغمزلها واتقوللها من غير صوت عدي امعاه
جنات خافت ايعصب منها اخرى ويصكر عليها الباب ماصدقت حن عليها وخلاها تطلع ..مشت شوره مدت يدها ترجف ..وهو مسكها وخش للفيلا
سفيان يمشي وجنات تمشي جنبه وساكتة …رقى بيها فوق …خش لداره ..قمعزها على سريره …ومشى فتح الدولاب فيه علبة ..جابها وجاء قمعز جنبها …فتح العلبة
سفيان : اي وحدة
جنات : كيف ..شن قصدك 
سفيان : رجلك ..اي وحدة فيهم انحرقت