**************************
ناضت جنات وشافت الساعة في فونها لاقتها 9 صبت توضت وصلت ..وغيرت دبشها لابست سروال جينز ازرق ..بلوزة حلوة طولها وسط ..حطت ميك اب خفيف ..مشطت شعرها ولان الفترة هذه قصير اتخلي فيه مطلوق ..وحطت وشاح على شعرها ..وكانت مصممة تحكي مع سفيان اول ماتشوفه
قعدت تبرم في الدار متوترة ..ومالة شن هالحبس ..مش متعودة تقعد في مكان واحد كم ساعة ..وابروحها 
قمعزت على السرير ..وتسمع فونها ايرن ..رنة وحدة وبس ..شافته لاقاتها مودة 
جنات ضحكت واتصلت بيها : الو
مودة : صباح الخير يا عروسة ..الف مبروك
جنات تذكر في موقف امبارح وتنهدت : الله ايبارك فيك
مودة : ها شن اخبارك ..امورك تمام
جنات : تمام
مودة : من بدري نبي نتصل بيك وخايفة ..قلت عرسان عاد وأكيد مش وقتي
جنات ضحكت بودن نية
مودة : احكيلي احكيلي ..شن شكله سفيان ..سمح والا شين
جنات : شين يقهر 
…وبعدها ضحكت 
…والا نقولك ليش الكذب … ننقانه سمح اجمل من أحميده كيكة بالف مرة
طبعا أحميده كيكة هذا شاب من درنة تعرفه جنات ومودة وديما متهبلات على سماحته ..وهن اللي علقن فيه لقب كيكة
مودة : ايييهههي
..احلفي 
جنات : وحق ربي
مودة : عليك حظ يا حنة ..إن شالله اللي مطرت عليك ترشرش علينا