اعيونها دمعوا …زعما شن دايرة بعدي …وجلال أمعها والا رد ايدور مع جماعته لعند الصبح …وتنهدت بحزن …خوالها قالوا مش حيسيبوا سليمة ابروحها حيقعدوا ايطلوا عليها ويشوفوا طلباتها ..لكن جنات قلبها مش مطمن على جدتها 
اللي ايضحك أن جنات كانت تبكي وتأكل …وكل ما يخطر عليها كلام سفيان وتصرفاته اتزيد تأكل أكثر 
بعد شبعت صبت لمة السفرة ..حطتها على الطاولة ومشت غسلت ..وردت رقدت في سريرها ..لكن المرة هذه خذاها النوم من التعب 
************************
الساعة 6 ونص الصبح ..جنات ناضت طايرة ..قمعزت اتحبت في الدار ..وبعدها ردت رقدت على ظهرها ..غمضت اعيونها وحاولت اترد ترقد لكن مافيش نوم
جنات اتصارع هي والمخدة مرة اتحطها على راسها ومرة اتضمها عشان ترقد ..لكن بلا فائدة ..اوووووفه
انقلبت للجيهة الثانية ..وبعد اشوي تسمع في همهمة ..صوت غريب ..قمعزت تسمع …الصوت مش واضح ….حاولت ترقد لكن الفضول قتلها ..صبت وانزلت من السرير ..مشت حفيانه بالشويا ..افتحت باب دارها بشويش ..طلعت رأسها ..الصوت وضح أكثر …كأنه طفل يضحك او يلعب
ردت بسرعة وصكرت الباب …وماصارشي ..فضولها تعرف مصدر الصوت ..جبرها تفتح الباب وتطلع بالشوايا على روؤس اصابعها ..