جنات برمت : ممكن تتطلع نبي انغير ادبشي 
سفيان برم مشى خطوتين ..رجله خبطت في السرير وقف ..وطبس ..وجنات تسرق في النظر من الجنب
وشافت كيف سفيان تلامس السرير لعند لاقى عصاته ..وجاكته …رفعهم والتفت فيها
سفيان عزق الجاكة على كتفه ورفع عصاه ايهدد في جنات : مانبيش مشاكل …حاولي تتأقلمي مع حياتك الجديدة …لان عاجبك او لا ..بتعيشيها كيف مانبي أنا 
جنات التفتت فيه بعصبية ..لكن هوا خبط عصاه بالارض ومشى لعند الباب افتحه وقبل يطلع برم شورها ورسم خط بعصاه على عتبة الباب : رجلك ماتفوتش الحد هذا من غير أمري ..والا والله ماتشوفي مني خير ..وأنا حذرتك
جنات تبي تحكي لكن هوا طلع وخبط الباب ورأءه …جنات مشت بسرعة لعند الباب ..تبي تفتحه لكن ..خوفها كان أكبر منها ..مش بس من سفيان ..من المجهول وراء الباب ..اللي قاعد مستنيها 
ابرمت واعيونها مليانات ادموع غمضتهم ورفعت رسها : ياربي خلاص والله ماعاد عندي قدرة انتحمل ..ارحم ضعفي ياربي 
بكت جنات للحظات وبعدها برمت بخوف وافتحت الباب لكن الصدمة الباب مش مقفول ..والمفتاح قاعد جوا فيه
وهذه حاجة ريحتها اشويا ..مشت لعند السرير قمعزت بتعب ..شن هالحظ ..أمتى نبي نتريح 
برمت بعيونها في الدار …كبيرة اثأثها حلو ..فيها باب أخرى شكله حمام خاص بيها …صبت افتحت الدولاب دبش نساء امعلق .. بس مش هيا اللي جابته ..بس طبعا مافيش اي شي ايخص سفيان ..تفرجت على الدار وفي رأسها مئة سؤال وبعدها خطر عليها فونها بعد ماجت للكوافير ومعاش شافته ..مشت تجري فتحت شنطة الدبش اللي جبتها امعاها …لاقته قاعد …وهذا ثاني شي زاد ريحها ..الباب مفتوح ..يعني برغم كلام سفيان ..بس هيا مش محبوسة ..وتليفونها امعاها