جنات ترجف : شش شنو
سفيان ضغط على راحة يدها : الخرا اللي امبلزتها في ايديك
جنات بحتت في يدها وفهمت انه يحكي على الحنة…لكن ماردتش عليه ..لانه طلق يدها وبرم مشى كم خطوة ..خبط السرير بعصاه ..وبعدها نزل العصا على السرير بدأ يفتح في جاكته ..عزقها على السرير ..فتح اول بطمتين من قميصه وبرم شورها
سفيان ايبحت فيها لكن من غير تركيز : مانعرفش كيف كنتي عايشة وعلى شنو متعودة ..بس من اليوم بتعيشي كيف مانبي أنا …مافيش اي شي من غير أمري ..حتى الدار هذه ممنوع تطلعي خطوة منها من غير مانسمحلك أنا ..تبي اي شي تطلبيه من صالحة ..اي ش…
قاطعته جنات : أنت متزوجني عشان تحبسني هنا ..من قالك بنرضى بشروطك …تحساب روحك شاريني بفلوسك 
سفيان حط ايديه في جيب السروال و رفع حاجبه : شن رائك أنتي 
جنات تذكرت أنها تزوجته عشان دين خوها : طبست منحرجة ..لكن الدم يغلي في عروقها …أنسان مستفز 
سفيان : سكتي يعني
جنات رفعت وجهها بعصبية : شن تبيني انقول…اصلا أنت كيف ترضى تتزوج وحدة بالطريقة هذه …تستغل في ضعف الناس بفلوسك …عشان تلقى وحدة ترضى بيك وأنت مع…
وبعدها جنات سكتت فجاة
سفيان ضحك على الجنب : أنا شنو كملي
جنات اتبحت فيه ..ومش قادرة اتقوله أنك معاق …لان بصراحة مافيش اي شي واضح ..او يدل على أنه عنده اي إعاقة …بالعكس واقف وشخصيته وكلامه ثقة وهيبة رهيبة