جنات خايفة منه بس خلاص حاطة في عقلها تحكي امعاه يا صحت يا خربت وهي خاربة خاربة من الاول 
جنات مشت بثقة لعند المكتب وفخري ايبحت فيها ومستغرب ..وسفيان يسمع فيها تقرب منه
جنات : نبي نحكي امعاك قتلك ..مانيش طالعة لعند نفهم
سفيان وخر الكرسي برجله واتكى عليه : شكلك ماتفهميش بالكلام ..ومازلت أنعامل فيك بالحسنى ..أطلعي
جنات : مانيش طالعة لعند تفهمني ليش تزوجتني
سفيان : أنتي أسمك جنة والا لا
جنات : أسمي جنات
سفيان : جنة وحدة ..واخرى واجد عليك ..شن جنات 
جنات تنرفزت منه : والله أسمي جنات عاجبك والا لا 
سفيان : أسمعي عندي شغل واجد ومش فاضي ..أطلعي أحسن مانخليهم يقفلوا الباب عليك يااا جنة
جنات اخبطت ايديها على المكتب والاوراق : أسمي جنات ..ج ن أ ت
فهمت والا لا ..ومانيش خايفة منك واذا كان مش اليوم فلازم تحكي امعايا وتشوف
ومشت جنات لعند الباب تبي تطلع لكن سفيان وقفها : جنة ..ياريت اتصكري الباب وراك
جنات تعصبت لانها حست أن اينرفز فيها قصدأ ..مسكت يد الباب وخبطاته بالقوة وطلعت
فخري طبس ورد يقرأ في الاوراق .لكن ماقدرش يمسك ضحكته بعد طلعت جنات 
سفيان رفع وجه فيه : عليش تضحك 
فخري : أصلك ماشفتش وجهها كيف أحمر وحركأتها وهي معصبة ..وخاصة بعد سمت أسمها بالحرف