جنات افتحت الباب واطلعت لاقت سفيان يمشي وامعاه فخري سفيان لابس تيشرت أبيض وسروال جينز أسود وماسك في يد جاكة سوداء ولاخرى فيها عصاته 
..وكانوا يبوا ايخشوا للجناح لاخر …هذا جناح لاصق في دارها مش لاخر اللي شافت فيه سفيان امبارح
فخري وسفيان التفتوا على صوت الباب انفتح …وسفيان عارف أن هذه دار جنات وقعد يستنى فيها تحكي
جنات متوترة واتبحت فيهم ..ولافت نظرها أن سفيان مرات ايبحت فيها ومرات للجيهة ثانية …وهنا تأكدت أنه مايشوفش فيها
جنات قربت منهم : سفيان نبيك
سفيان : شن تبي 
جنات : نبي نحكي امعاك في موضوع مهم
سفيان : مش فاضي …ومافيش شي نحكوا فيه اصلا وبعدها من سمحلك تطلعي من دارك ..خشي وصكري الباب
وبرم وفخري فتح الباب وخشوا ..وجنات تبي اتموت ..قعدت تغلي ..مشت خطوتين تبي اتخش لدارها ..وبعدها غيرت رائها ..خذت نفس عميق وقربت من الدار اللي خشها سفيان وافتحت الباب بالقوة 
سفيان كان دوبه مقمعز على كرسي المكتب ..وفخري امطبس ويقرأله في اوراق على الطاولة
سفيان رفع وجه لباب وفخري ايبحت في جنات مستغرب خشتها عليهم وهي مش خايفة
جنات : سفيان نبي نحكي أمعاك 
سفيان : أطلعي وصكري الباب وأخر مرة تفتحي عليا المكتب بالطريقة هذه