ملاك قمعزت : جبتلكم فطور ايهبل …أكيد سفيان يمشي ايشوف ساااا…وبعدها سكتت وخافت كنها قبل حكت في شي ممنوع تحكي عنه 
جنات : شنو ؟!!
ملاك صبت : اااءء نبي نمشي قبل ايجي شيباني ..اءاء قصدي سفيان 
جنات صبت وراءها بسرعة : ملاك
ملاك : نعم
جنات : قصدك بالشيباني سفيان خوك
ملاك التفتت وراها كأنها خايفة واحد يسمعها : اها هوا 
جنات : وليش ..هوا عنده اسمين ؟!!
ملاك : لا لا .هوا أسمه سفيان ..بس من هوا صغير ماشي فيه لقب الشيباني ..عشان الشيب اللي في شعره
جنات : اااها ..يعني الشيب فيه من هو صغير
ملاك : من لما وعيت على الدنيا وهذا شكله …وماما قالتلي فيه من لما كان صغير 
جنات : ماما ؟!! قصدك أم سفيان ..وين هيا ليش ماشفتها بكل
ملاك وجهها تغير وخافت : نبي نمشي خلاص ..أكيد صالحة تبيني
ومشت خذت سفرة العشاء واطلعت تجري ..وجنات صكرت الباب ..وهيا اتفكر شنو العائلة هذه اللي كلها اسرار 
****************************
فطرت جنات وتغدت وهي اتراجي في سي سفيان ايجي يحكي امعاها و تفهم منه اي شي ..لكن سفيان مالهش اي أثر
جنات ملت وطاحت رقدت …ناضت على المغرب ..صلت وغيرت لابستها ..وبخت من عطرها ..ومشت افتحت الدولاب تبي تاخذ وشاح ..سمعت عصا سفيان في الممر .. تحسابه جاي للدارها ..لكن الصوت بدأ يتباعد وهي لابست الوشاح بسرعة وطلعت كانت تستنى فيه من الصبح