ثم تابع وهو يجذبها من ذراعها يهتف بغضب قائلًا: هتعملي ايه تاني سيبيهم في حالهم بقى ده كويس اني كنت عامل حسابي أبقي قريب منه النهارده.
ابتسمت ثومه بخبث قائلة: متخافش أبوك ده على عيني وعلى راسي وأنا مش ناويه أذية حد المرة دي.
عقد ما بين حاجبيه لتجيبه على دهشته قائلة: بس بدل ما يكون المهندس الجديد من تبع المهندس القديم يبقى من تبعنا.
جحظ زيان بعينيه غير مستوعب لاقتراحها قائلًا: ازاي بقي يا فالحة وهو كلم بنفسه المهندس قدامي وقاله خلال أسبوع هيشوف ليه واحد كفء للموضوع ده.
ثم استطرد بسخرية قائلًا: هيبقى من تبعنا ازاي؟
لوت ثومه شفتيها بمكر قائلة: والله ملكش فيه بقى طالما بتستهين بقدراتي وخايف على أهلك مني. أهلك اللي مستعدين يبعوك علشان خاطر السنيورة.
و استطردت وهي تبتعد عنه قائلة: إنما أنا خايفة عليك.
اقترب منها محاولًا مداعبتها حتى تبوح له بمخططها فتخابث قائلًا: ليه كده بس يا ثومه بتفهميني غلط أنا مش قصدي حاجة أنا قصدي بس هما ملهمش ذنب.
سخرت منه ليستطرد بحقد قائلًا: البت لاحسة مخهم وكل أما توقعها تيجي حاجه تقومها.
زفرت ثومه باختناق قائلة: أنت هتقولي أنا لولا اني عايزة الفلوس كنت خليت اللي بالي بالك يضحك عليها ويرميها.