نور بصوت عالي/ يعني ايه مش عايزاني أعرف مكانها. انا جوزها ومن حقي اعرف مراتي فين
أسر / ودا شئ مايخصناش دي ماهي قالتلك. علشان تتكلم معاها بالأسلوب ده.
سيلين/ أستاذ نور لو صديقك طلب منك مساعدتك وانت تقدر تساعده هتبخل عليه بالمساعدة دي. انا مقدرة اللي انت بتقوله لكن انا ماقدرش اخالف مبادئي و اقولك هي فين. بس اللي اقدر اقولك عليه اطمن هي كويسة وهي ماسفرتش ولا هربت لكن محتاجة تكون لوحدها شوية
نور بهدوء/ انا عارف انك بتساعديها وأن هي رغبتها اني معرفش مكانها لكن صدقيني انا قلقان عليها وماقدرش اسيبها في مكان انا ماعرفهوش بعيد عني و لوحدها و معاها بنتنا
سما تعبانة اصلا وحالتها ماتسمحش باللي هي عملته ده
سيلين / يمكن كلامك صح. بس اللي انا شيفاه أنها قوية أو بمعنى أصح بتحاول تكون قوية وأنا ماقدرش اتدخل في حياتكوا. وطبعا اللي انا شيفاه دا انا مش بفرضه عليك أو عليها انا بس بصحح كلامك. أو بقولك رأيي الشخصي لكن انتوا أحرار طبعا في حياتكوا
نور بيحاول يهدي نفسه ويتمالك أعصابه / تمام. انا عايز اكلمها. اكيد طبعا في طريقة تقدري تتصلي بيها فى المكان اللي هي فيه غير تليفونها اللي مابيجمعش ده
سيلين / يا استاذ نور ا
قاطعها أسر / سيلين. لو سمحتي انتي كدة زودتيها اوي. انا معاكي أنك ما ينفعش تقوليله على مكانها ومش عايزة تتدخلي لكن على الأقل خليها هي بنفسها تقوله كدة.