هاجر / و خلاص ليه ما أنا بقيت الملطشة بتاعة البيت كل اللي عنده كلمه يقولهالي
محمد / اووووف. في ايه يا هاجر انتي بتتلككي
هاجر / مش انا اللي بتلكك انتوا اللي ماحدش فيكوا طايقني اصلا
محمود / استغفر الله العظيم
نورا / بقولك ايه يا هاجر. تعالي ندخل نشوف ملك نامت ولا لسه ونطمن على ماما سناء هي كمان
( هاجر مشيت مع نورا ودخلوا القصر بتاعهم. )
محمود / أحمد تاني مرة لما اكون بتكلم مع مراتي ماتتدخلش وانت عارف اني مستحيل اسمح لأي مخلوق على ضهر الأرض يقول كلمة واحدة على سيلين
أحمد / اولا انا ماقصدتش اتدخل ثانيا بقى. انا فعلا مش طايقها لأنها مش كويسة واللي انت ماتعرفهوش أنها من شوية كانت بتتكلم في الموبايل مع صاحبتها في الجنينة. وأنا وسيلين و نها ورامي كنا قاعدين في الصالون اللي بيطل على الجنينة وسمعناها وهي بتقول ( وقلد صوتها ) . بنوا الأرض اللي كانت بين القصرين وشوهوا المنظر وطول الوقت دوشة وصداع والجنينة مابقتش جنينة بقت رمل وظلط وقرف
محمد / وهي مالها هي وازاي تتكلم في حاجة زي دي مع صاحبتها اصلا
محمود / وانت ماقولتليش ليه الكلام ده لما حصل
أحمد / انا اصلا كنت هقوم وأتكلم معاها لكن سيلين منعتني وقالتلي كبر دماغك منها