سما / حبيبتي روحي سلمي على بابا قبل ماتدخلي المدرسة
نورسين/ لاء يا ماما مش هسلم عليه. وأنا مش هدخل المدرسة واسيب حضرتك لوحدك معاه. هفضل معاكي علشان ماتخافيش
سما بابتسامة حزينة / حبيبتي دا بابا ما ينفعش تقولي كدة وكمان انا مش خايفة منه. انا كنت بقول لطنط سيلين خايفة. لكن مش قصدي اني خايفة منه هو
نورسين/ برضوه مش هسلم عليه. اسفة يا مامي بس بابي غلط في حقنا كتير اوى لو انتي هتسامحيه انا مش هسامح
( نور كان نزل من عربيته وقرب منهم وتقريبا سمع آخر جملة لبنته )
نور بهدوء / نورسين حبيبة قلبي
نورسين بصتله بنظرة وجعته اوى وماردتش عليه وسابته ودخلت من بوابة المدرسة
نور مسك ايد سما بعنف / انتي قولتي ايه لبنتي ها. فهمتيها ايه عني بتستغلي البنت بينا
سما شدت ايديها منه بعنف وركبت عربيتها واتحركت بأقصى سرعة
وهو لحقها كمان وفي خلاص دقايق كانوا وصلوا المقطم
( المكان اللي ياما شاف مواقف بينهم وشهد عليها )
وبمجرد ماوقفوا ادام بعض كانت سما ضربته بكف ايديها على وشه. صوت الضربة اتردد في المكان حواليهم
( نور اتصدم. من الألم و وقف يبصلها بأندهاش و ذهول. )
سما بدموع وصراخ / كل ما اقول اني خلاص دموعي خلصت بتفاجئني بجرح جديد يخلق بحر من الدموع
كل ما اقول اني مش فارق معايا تصرفاتك وقلبي شاف اوجاع كتير بأندهش بوجع وكسر لقلبي أكبر من اللي قبله
انت ايه
انت ايه مش بني ادم مابتحسش بيا ليه.
ليه كل اللي بتعمله فيا ده بتعاقبني على ايه. على حبي ليك. بتعاقبني على اخلاصي لحبك وعشقك اللي بتنفس هواه
بتعاقبني لأني بفكر فيك قبل مافكر في نفسي وفي مشاعرك قبل مشاعري واحساسك قبل احساسي
( وقربت تضربه على صدره بقوة وهو متجمد مكانه )
بتعاقبني على ذنب انت بدايته وأساسه بتعاقبني على قرار كان عشانك
انا تعبت والله تعبت
دلوقتي ساكت وبتسمعني. لكن قبل كدة. ماكنش فيه غير الكره والحقد في عيونك وقلبك
أول مرة عاقبتني فيها لما هربت منك وبعدت.
انا هربت عشانك وقتها. هربت علشان ما اوجعكش ولا اكون سبب في ألمك وانت كنت السبب لما اجتنبتني وقتها وحسستني اني مصدر وجع ليك
وقتها بعدت وما اتحملتش اني اكون حتى مجرد سبب في وجعك . يعني فكرت فيك مافكرتش في نفسي وبرغم كدة لحد الآن لسه شايله ذنب هروبي و بعدي
وحتى لما رفضت أن أبوك يتجوز أمي. مارفضتش علشان نفسي. رفضت علشانك
مافكرتش أرفض علشان هو هياخد مكان ابويا. لكن فكرت أنك هتتوجعه لو اتخيلت أن أمي هتاخد مكان أمك
رفضت علشان انت ماتتوجعش رفضت ما اضطرش أحس إني بوجعك مرة تانية
مافكرتش أن أمي ست ومن حقها تعيش حياتها وتشوف نفسها وتتجوز حد بيحبها وأنا وهي متأكدين من عشقه ليها
فكرت فيك انت
كنت أنانية بس علشانك
ودايما انا كدة انت قبلي
وقلبك قبل قلبي
و وجعك قبل وجعي
وكان ايه المقابل
( وبصراخات موجعة ) . عقاب. كره حقد عنف إهانة وجع قهر ظلم
وفي الاخر تتهمني بتشويه صورتك في عيون بنتنا.
طيب لو انا مش بحبك وبسبب أفعالك بقيت بكرهك. تفتكر هكره بنتي واخليها تكبر بعقدة تجاه أبوها
لكن انت مافكرتش في كل ده
انت كل اللي على بالك اني وحشة. اني بأذيك اني بوجعك اني أنانية وخلاص مش عايز تشيل الصورة دي من دماغك
وفي كل اللي حصل ده انت مافكرتش في بنتك وماحولتش حتى تيجي على نفسك علشانها
بنتك اللي عارفة انك كنت تأذي أمها وتتجوز واحدة غيرها
بنتك اللي بتقول بابا مش بيحبني بابا عايز يتجوز علشان يخلف ولد ويحبه لأنه مابيحبناش يا مامي
عارف حسيت بايه لما بنتي قالت كدة.