سما / ازاي تعمل كدة. ازاي يا نور
نور / والله ماهزعلك تاني ابدا ولا هجرحك بس سامحيني. انا غلطان ومش هعمل كدة تاني. قولي لنورسين اني بحبها اوى هي كمان. انتي وهي عندي بالدنيا كلها. ومش عايز ولاد ولا حتى بنات تاني. انتوا كفاية عليا والله ماعايز غيركوا
سامحيني علشان خاطري.
( ودموعه نزلت وهو بيتكلم بضياع وهي ماقدرتش تشوفه كدة واخدته في حضنها علطول )
سما / بس يا نور اسكت
نور / سامحيني وخلي نورسين تسامحني وترجع تحبني زي الأول يا سما.
مش قادر أعيش من غيركوا. مش بس انتوا مالكوش غيري. انا كمان ماليش غيركوا يا سما
أبويا مات وسابني يا سما. مات خلاص. وأنا حسيت ان ضهري اتكسر كان ابويا واخويا وصاحبي. كان غصب عني اني اجرحك
( سما ضمت راسه بقوة وسابته يبكي ويطلع اللي جواه وهي كمان كانت بتبكي معاه وفي الوقت ده نسيت كل اللي حصل منه )
وبعد وقت لما حست انه سكت خالص وانفاسه انتظمت عرفت انه راح في النوم
وبصعوبة كبيرة فردت جسمه على الكنبه ودخلت غرفة من غرف النوم وجابت مخدة وبطنية تغطيه بيها
وبعدها قعدت على الأرض جنب راسه تبصله كتير
لدرجة انها ماحستش بالوقت وهو بيعدي و ايديها بتملس على شعره بحنان وعشق واشتياق . وحشها اوى اوى
ملامحه الهادية البريئة وهو نايم كانت وحشاها جدا بقالها اد ايه ماشافتهوش وهو بالشكل ده
وعند النقطة دي رفعت ايديها من على راسه وافتكرت افعاله وتصرفاته
هو صحيح ندمان. لكن لازم يتعاقب لو ماكنش علشان كرامتها وحقها وراحة قلبها. يبقى علشانه هو
علشان ما يعمل كدة تاني. وبعدها يقدروا يكملوا حياتهم بشكل طبيعي