و سما ماشية على خطة سيلين بالحرف الواحد
وحاسة بأنتشاء كبير وهي بترد له كل حاجة عملها فيها
أوقات بيصعب عليها لكن مجرد ذكرى بينهم تخليها تجمد وتصر على موقفها
ونور بيفاجئ من تصرفاتها و ردود أفعالها لكن بيستحمل.
نورسين خلصت امتحانات واخدت إجازة نهاية العام الدراسي ومبسوطة جدا وبتحاول تساعد نور علشان مامتها تسامحه ويرجعوا زي الأول.
@@@@@@@@@@@@@@@@@@@@
سما نازلة من العمارة وهتركب عربيتها و معاها نورسين
نور وهو ماسك بوكيه ورد/ اجمل صباح على اجمل وردتين في الدنيا
نورسين وهي بتحضنه / باااابي
سما / لا حولا ولا قوة إلا بالله. نورسين خلصت امتحانات امبارح على فكرة ومش محتاجة انك توصلها للمدرسة
نور بأبتسامة / ما أنا عارف
سما / ولما أنت عارف جيت ليه
نور / علشان علشان اخرجكوا النهاردة ونحتفل بمناسبة انتهاء الإمتحانات بتاعة نورسين
نورسين بفرحة / هيييييييييييه. احلى بابي في الدنيا
سما / طيب براحتك ولما تخلص ابقى وديها عند ماما. وأنا هفوت اخدها بعد الشغل من هناك لأني هتأخر النهاردة
نور / أنا بقول هنخرج كلنا مع بعض يا سما. مش أنا و نورسين بس
سما / وأنا مش فاضية للخروجات والفسح. وعندي شغل اتفضلوا انتوا ربنا يسعدكوا وتمنياتي ليكوا بيوم سعيد