مديحة / ماهو بصي بقى يا تيجي انتي وبنتك تعيشوا هنا يا نروح كلنا كدة نعيش معاكي في الشقة زي ما كنا قبل كدة
تالين / وأنا مع ماما و موافقاها مية بالمية
سما بتنهيدة / ممكن تسمعوني كلكوا للاخر
أولا أنا قعدتي في الشقة مش هتطول كتير علشان كل ده
ثانيا. أنا مبسوطة جدا. بكلامكوا واهتمامكوا. لكن بجد انا محتاجة اني اكون لوحدي شوية وفي المكان اللي يريحني.
لكن علشان خاطركم هبات معاكوا هنا في الإجازة الأسبوعية بتاعة الشغل واللي هي النهاردة وبكرة
@@@@@@@@@@@@@@@@@@@@@
في قصر أسر وسيلين
العيلة كلها متجمعة وقاعدين بيتعشوا وسيلين مبسوطة جدا وبيضحكوا ومافيش اي خلافات موجودة
والأجواء ممتازة ومرحة . وخاصة بين رامي و نها. اللي ميعاد ولادتها قرب وشكلها مختلف تماما
رامي / يا بنتي والله انا لما ببصلك مابصدقش انك نها صديقتي.
نها بتذمر / فارس وبعدين خليه يسكت
فارس / بس ياض اسكت دي قمر والحمل زادها جمال
رامي / فعلا. دي حتى قربت تبقى جمال نفسه
نها / عجبك كدة يا اونكل سامي شايف ابن حضرتك بيقول عليا ايه
سامي / سيبك منه دا عيل اهبل. مش عارف والله يا بنتي طالع لمين
محمد بضحك / نهار احوس.عمي اتبرا منك يا رامي
أحمد / ممكن يكون مش تبع العيلة اصلا وتم تبديله في المستشفى بعد الولادة