نورسين / تعالي معانا يا مامي علشان خاطري
سما بأبتسامة/ حبيبتي خاطرك عندي بالدنيا كلها. واوعدك اني انا وانتي هنخرج يوم مع بعض ونقضي طول اليوم سوا وننبسط إنما أنا ما ينفعش أخرج معاكوا النهاردة.
نورسين / ليه ما ينفعش
سما / مش انتي بتحبي مامي وبتحبي تريحيها
نورسين / أه
سما / يبقى اسمعي كلامي وخليكي شاطرة علشان ماازعلش منك
نورسين/ حاضر يا مامي
نور / نورسين اركبي العربية يا حبيبتي
نورسين ركبت العربية بعد ما واحد من الحرس اللي ورا نور فتحولها باب العربية الأمامي
نور / وبعدين يا سما. هتفضلي كدة لحد امتى
سما بنظرات سخرية / انت اللي وبعدين معاك. هتزهق امتى
نور / انتي ازاي بقيتي كدة يا سما. مش قادر أصدق انك بتبصيلي كدة او بتكلميني كدة
سما / البركة فيك اتعلمت منك يا استاذ نور. وانت كنت نعم الأستاذ
نور / اسف يا سما. قولتلك مية مرة اسف ومستحيل أكرر الغلط ده تاني
سما / ولو قولتها بدل المية مليون مرة. قلبي مش قادر يسامحك يا نور. غلطك أكبر من أنه يضيع بكام كلمة اسف و بوكيه ورد
نور برجاء / ماتبقيش قاسية عليا اوى كدة يا سما دا أنا نور حبيبك
سما / و دا ما اتغيرش هتفضل نور حبيبي طول العمر.
لكن أنا اللي اتغيرت وياريت تتقبل التغيير ده.