ولو زودتي في الموضوع دَ وخليتي حد يكلمني فيه تاني أنا وقتها مش هكتفي بجملة مافيش نصيب، لأ هقول كل حاجه ومعايا الشات كله، روحي للي كنتي بتكلميه خليه يخطبك هو أولى بيكي ولا هو مش هيرضى لأنه لما معرفش يطلع منك بمصلحة بعتلي كل اللي بينكم، عيب عليكِ حافظي على نفسك وعززي منها شويه البنت ما هي إلا اخلاق
كل كلمة كانت بتقع عليها زي صفعة، وهو مكمل من غير ما يديها فرصة تدافع عن نفسها.
فيروز: عشان خاطري متسبنيش يا عمر، أنا مقدرش اعيش من غيرك بقالك سنه سايبني وأنا مش قادره انساك وعرفت غلطتي ومش هكررها، أنا بجد آسفه اديني فرصة أصلح أخطائي
دموعها نزلت، بس عمر كان خلاص قفل الباب.
عمر: أنا قُلت اللي عندي وياريت تحذفي رقمي من عندك خالص وربنا يهديكي.
لفّ ضهره ومشي، سايبها واقفة لوحدها، لأول مرة تحس إنها خسرت كل حاجة بجد.
___________
في بيت فريده، الهدوء كان مالي المكان، هدوء تقيل، فيه حنين وفيه خوف من الجاي.
رياض: اسمعي الكلام يا فريده وقومي جهزي شنطتك عشان عمر جاي ياخدنا النهارده وهنرجع البلد
بصّتله وهي حاسة إن القاهرة بقت آخر حاجة فاضلالها من حياتها.
فريده: من فضلك يا جدو أنا قُلت لحضرتك إني مش هنزل البلد دِ؛ لأن أنا حياتي هنا وكليتي هنا ومش هسيب بيتنا.