________
أماني: اصحى يا اخويا وفهمني اللي بيحصل من ورايا هو الكلام اللي سعيده قالته ليت مظبوط يا حسام
حسام: أصبحنا وأصبح الملك لله سعيده قالتلك إيه على الصبح؟
أماني: قالتلي الحاج عايز يخطب فريده لعمر
حسام: يا ألف نهار ابيض دا إيه الأخبار اللي تفتح النفس دي، والله فرحتيني، بقولك خديلك ٢٠٠ جنيه مقابل الخبر الحلو دا، بقى فريده تبقى لعمر معجزة من المعجزات دي خلي بالك
أماني: يعني انت شايفني متضايقه وانت تقولي فرحان، مستحيل حاجه زي دي تحصل، يعني إيه اللي إسمها فريده تاخد عمر من فيروز، يا أنا يا هي والجوازة دي مش هتكمل، قوم فكر معايا في حل مش كفايه هي شريكة في الشركة بنصيب أبوها عايزه تاخد إيه تاني
حسام: و أدي قاعده، خير يا أماني أنا باجي من الشغل تعبان ومش شايف قدامي عشان ارتاح هنا ومش بلاقي راحة.
ركزي كويس مش أنا اللي اسمع كلام مراتي في الغلط، أنا صابر عليكِ وعلى زنك عشان ولادنا اللي انتِ أصلًا مبتسأليش فيهم وسيباهم مع أمي تأكل وتشرب وتغسل وحضرتك نايمة في مية البطيخ، بس بقول معلش هتعقل، اكيد عندها دم وهتحس بس مافيش فايده.
كمان غلطه واحدة وهطلقك واللي ليكِ عندي هتاخديه، وهتجوز اللي تدلعني وتاخد بالها مني ما أنا مش مجبر استحملك اكتر من كدا، أنا قاري اللي في دماغك كويس أوي فعيب يا بنت الناس وإلحقي اللي فاضل من كرامتك أنتِ واختك، أنا مش مخليكِ عايزه حاجه وبصرف عليكي وعلى اهلك، فوقي لنفسك عشان متندميش وسيبي عمر وفريده وأهلي كلهم في حالهم، فهمتي يا منمن ولا اعيد تاني؟