– قولي يا احمد اللي عملته ده صح ولا غلط ، سيف مش من حقه لوحده يفتح الماضي ، الماضي ده يخص اطراف كتير ، اولهم مراد اللي مايعرفش حاجه عن حادثه وفاه والده وكمان بابي ومامي هترجع تعيش احداثه وتعيش الوجع من تاني ، غلطت ان خايفه علي أمي من الانهيار ،اللي حصل زمان ماكنش سهل علي مامي انها تعيشه ، ليه اساعده في جلب الحزن لاهلي من جديد ، صحيح والد سيف كان مريض نفسي زي مابيقول وغير مسئول عن تصرفاته ، بس اللي اتاذي بسببه ناس كتير مش مجرد شخص واحد ، ازاي حتي لو مريض نفسي يتاسب كده ياذي نفسه وياذي اللي حواليه ، مكانه المفروض في مصحه يتعالج ، مش يخطف ويقتل ويتم طفل بريء ، والد حاول يهدم عيله وخطف مامي بالابتزاز والتهديد بقتل بابي ، يعني كان ممكن انا كمان اكون مكان مراد ، سيف مافكرش في كل اللي انا حساه ، فكر يثبت براءه والده علي حساب اشخاص تانيه موجوده مالهمش اي ذنب بردو في اللي حصل لوالده بالعكس كان الضرر واقع عليهم ، بابي قالي هينسي الماضي عشان انا اعيش الحاضر والمستقبل مع سيف ، سيف عاوز ايه تاني اكتر من كده اهلي رحبو بيه ووافقو عليه وخلاص كان ممكن نقفل صفحه الماضي بكل وجعها ، انا بجد موجوعه اوي يا احمد ، قلبي بيتالم علي كل اللي بشوفه وبيحصل ، لا قادره اتكلم ولا قادره اسكت واقف اتفرج ، عرفت ليه بقى ان الحب اللي بيني انا وسيف مهزوز ومحكوم عليه بالموت .