+
همست مبتسمه : حلوه اوي الاغنيه
– كان قلبها طاير بحبي وزعلانه ان بتقل عليها ، كانت متخيله ان بتقل عليها ومش عايز اصارحها وانا كنت جوايا بقولها الف كلمه وكلمه ، كلمه بحبك مش كلمه سهله تتقال وخلاص ، ده احساس مشاعر وعد بحاجات كتير ، كنت بحافظ عليها عشان حبها كان طاهر ونقي ، بنوته رقيقه الدنيا مش لوثتها مش عاوز اجرفها لحاجات تانيه ، كنت بحافظ علي حبها جوايا ، خايف عليها من نفسي صاينها وصاين مشاعري عشانها ، ياريتها معايا عشان تعرف مافيش حد دخل قلبي ولا هيدخله غيرها ..
والحمد الله خرجت من حاله الصدمه وادركت الواقع المرير ووجودك في حياتي هون عليه كتير ، بس طبعا مش نساني حنين ، رجعت لحياتي ولطيوري واهلي اللي بحبهم ، كمان عبدالله ده روحي اللي مااقدرش استغني عنها ، حسيته تايه هو كمان من غيري ، وانتي حاليا يا ليلي بتعيشي نفس الفتره الصعبه اللي عشتها ومريت بيها ، بس مش تقبلي بالهزيمه يا ليلى ولا تيأسي ، عشان كده بقولك وانا واثق في كل كلمه بقولها لو حبك لسيف قوي وتقدرو تتخطو بيه الماضي وتنسو اهلك واهله وتعيشو حاضركم انتم ومستقبلكم ، هتتجاوزو اي صعب مع بعض وماحدش هيبعد عن التاني بالعكس دي محنه ولازم تقربو فيها لبعض وكل واحد يسمع لتاني بقلبه مش بعقله ولا بكل اللي بيتقال ويحصل حواليكم ، ماتخلوش حد يتحكم في الحب اللي بينكم ويدمروه ، دي عاصفه قويه بتمر بمشاعركم لو اتهزت مع العاصفه تبقي هتقضي علي كل حاجه حلوه بينكم ولم العاصفه تخلص هتعرفو الحب ده قوي ولا سهل يتهد في زوبعه العاصفه ، انا اخوكي وبقولك لو واثقه في حبك من سيف حقيقي وانه حد مهم جدا في حياتك مش مجرد شخص عادي ، يبقي تحطي ايدك في ايده وماتسبهوش يحاول لوحده يثبت لدنيا كلها مرض ابوه ، حتي لو ده ضد مبادءك بس ده اختبار ليكي ، حق سيف عليكي انك تفضلي جنبه تدعميه وتسانديه ، عشان حياه سيف الجايه هتكون مترتبه علي براءه والده