دق باب غرفته بهدوء ثم دلف ينظر له : لسه صاحي يا مراد
رفع انظاره عن الاوراق واغلق دفتره ثم نهض من مكانه وهو يهتف بابتسامته الهادئه : صاحي يا بابا ، اتفضل
اقترب معتصم منه ثم وضع يده يحاوط كتفه ويسير به الى حيث الشرفه :
– تعالي بعيد عشان ماما ماتسمعناش
نظر له باهتمام : ده موضوع كبير بقى
أومى له بخفه وهو يقول : روحت ل ليلى مش كده ؟ واكيد عرفت باللى عمك نديم عمله ؟
ابتلع ريقه بتوتر ثم هز راسه بالايجاب وقال : لم رجعت حاولت اتصل بيها واطمن عليها قلقت لم لاقيت فونها مغلق ، اتصلت بعابد بلغني باللي حصل ، حسيت انها محتجالي جنبها نزلت روحتلها واتكلمت معاها ، كانت منهاره وطلبت
طلبت مني اساعدها وأحاول اتكلم مع عمو نديم واعرف سبب رفضه وأنا وعدتها هتصرف، حضرتك تعرف السبب ؟
نظر له بصدمه وحدث نفسه : انت الوحيد صعب تعرف السبب ،لازم تفضل صورة والدك نقيه ماينفعش تتلوث
عاد يهتف بتسأل : بابا حضرتك تعرف سبب رفض عمو نديم ل سيف
فاق من شروده : ها ،، لا يا حبيبي كل الحكايه نديم شايف ليلة لسه صغيره على الارتباط وبعدين أنا جاي اتكلم معاك فى حاجه أهم
– اتفضل
– هتفضل مخبي مشاعرك لحد امتى وازاي هتقدر تساعدها وتقنع نديم بموافقه على سيف ، ليه تعمل فى نفسك كده ؟
حك عنقه ثم نظر لوالده بألم : مشاعري أنا مسئول عنها يا بابا ، ودوري كصديق لازم اقف جنبها واعمل واجبي كصديق
– وامته هتنطق كحبيب ، هتسيبها تضيع من ايدك وكمان تحاول تقربها من الشخص اللى هي بتحبه وكل ده على حساب نفسك ومشاعرك
– حضرتك قولت الشخص اللى هى بتحبه واللى هى اختارته ، ماينفعش اتكلم خلاص عن مشاعري ، فات الوقت ، مابقاش ينفع غير أن علاقتنا تفضل اخوات وأصدقاء ، عشان لو قولت اي حاجه غير كده هكون بخسرها للابد وانا مااقدرش اتحمل خسارتها ، راضي اكون صاحب واخ مش طالب اكتر من كده .
عانقه والده وظل يربت على ظهره بحنان : ربنا يسعد ايامك يا بني ويريح بالك
ابتعد عنه برفق وهو يهمس بصدق : ربنا يخليك ليا يا احسن سند فى الدنيا ، أنا بالي مرتاح طول ماحضرتك فى ضهري
ابتسم له بحب ثم ودعه وغادر الغرفه وهو يشعر بالحزن والاسي على طفله الذي كبر باحضانه وأصبح الآن شابا يافعا ولكن عندما دق قلبه احبب فتاه تعشق اخر وهو مازال يعشقها بكل جوارحه …