منتظر دعمك ، مساندتك ، دي معركتنا سوا ولازم نفوز بيها ، نكون ايد واحده ، مااعرفش عنك من يوم ما عرفتك انك ممكن تضيعي حق مظلوم
هتفت بحزن : سيف اسمعني الماضي مايخصناش لوحدنا ، في طرف تالت معانا ، ماعندوش اي فكره عن اللي حصل زمان ، ليه نرجع نفتحه ونفتح جروح قديمه تخص جميع الاطراف
ضيق ما بين حاجبيه وهو يصرخ منفعلاً : مين الطرف التالت اللي خايفه علي مشاعره ويهمك اكتر مني ومن مشاعري انا وبالظلم اللي بيوقع عليا انا من يوم ولادتي لحد دلوقتي .
تقدمت خطوه للامام لتقف امامه بعدما ابتعد عنها ، وهمست بصوت دافئ : مش مفروض يكون اهم منك عشان اطلب منك تتراجع عن قرارك ، بس ظهور القضيه دي للعلن هتأثر علي حياه شخص تالت وهتأذيه جدا ، ماانكرش ان الشخص ده غالي عندي ، ومش هقدر اخسره وفي نفس الوقت مش عايزه اخسرك
– يعني عندك استعداد تخسريني لكن ماعندكيش استعداد تخسري الشخص ده
– سيف افهمني انا مش عايزه اخسركم
– اعرف مين المهم عندك اوي كده ، وعندك استعداد تخسريني انا عشانه ، رغم ان تمسكت بيكي وحاولت تاني ولسه بحاول عشان اكون جدير بيكي واستهال اكون شريك لحياتك ، ماهتمتش بكرامتي لم والدك طردني من بيته مازعلتش واستسلمت وبعدت لا قررت احارب عشانك واتمسك بيكي اكتر وبثبت نفسي عشانك ، ماتتصوريش احساسي كان ايه وانا فرحان ان والدي مريض نفسي عشان مايكنش ارتكب جريمه وهو واعي وبكامل ارادته ، عشان انا بحب ابويا اوي ومش عايز اكره ولا اشوفه بصوره وحشه ، وانتي جايه دلوقتي تقوليلي بلاش افتح الماضي ، علي الاقل عشان تفضل صوره ابويا كويسه قدام عيني طول الوقت ، علي الاقل احاول ارفع راسي قدام الناس اللي عندها علم بالماضي ، وارفع الظلم عني ، بتعاقب بحاجه ماليش ذنب فيها