اجتمع الجميع في الصالون ينتظرون حضور ادم ووالدته ووالد عدى
وبعد أن دلفوا رحب بهم سالم وزوجته وايضا فهد وزوجته والفتيات
وسلمت على الحاجه عون ورحبت بهم فهتف محمود المنياوى قائلا: دى بقا الحاجه عون بركة البيت
خديجه: اهلا وسهلا ياحاجه
الحاجه عون: اهلا بيكم ياحبيبتى البلد نورت
خديجه: منوره باهلها يا حاجه
اقتربت أسماء تسلم على زوجة عم عدى قائله: اهلا يا طنط نورتينا
خديجه ام ادم وزوجة عم عدى : دا نورك ياحبيبتى بسم الله ماشاء الله زى العسل يا أسماء
محمود المنياوى: لا ودمها كمان زى العسل يا ام ادم
خديجه: حلو ماهو عدى عايز الفرفوشه إللى تناغشه وتستحمل هزاره
عدى : ايوه يا مرات عمى كلميهم عن مميزاتى
ابتسمت قائله: لا ما هو اصل الجنان دا انا عايشه فيه مع ادم ابنى برده لولا أنهم ولاد عم وبينهم فرق سن كنت قولت توأم الاتنين مجانين
أدم : ليه بس يا امى كدا مش تسيبيهم يتعرفوا عليا الاول وبعدين تعرفيهم انى مجنون
عدى : لا متقلقش ماهما اول ما هيتعرفوا عليك هيعرفوا انك معاك شهادة معاملة اطفال
أدم : ودا على أساس أن حضرتك ايه بقا ؟
عدى : معايا نفس الشهاده يابنى وعليها ختم النسر
ضحك الجميع على طريقة حديثهم معا
خديجه: هى أسماء ملهاش اخوات تانيين يا حاجه زينب
زينب: لا ليها ليها فهد ابن عمها وأخوها ولها جهاد اختها اكبر منها دكتوره واختها ملك داخله اولى كلية هندسة زى أسماء
والحلوه الصغننه دى زينه سلمى على تيته يا زينه
سلمت خديجه على زينه وقبلتها وهتفت قائله: ماشاء الله يازينه زى القمر .
خديجه: بسم الله ماشاء الله ربنا يباركلك فيهم
على فكره انا عارفه فهد من زمان وعارفه مراته عاليه ؟ امال هى فين مش باينه معاكم ؟
رفعت زينب رأسها تنظر لليالى التى اخفضت رأسها وهتفت قائله: لا ماهما انفصلوا وفهد دلوقتي متجوز ليالى .
خديجه: ليالى .
زينب وقد شعرت بحرج ليالى فهتفت قائله: تعالى يا ليالى
فتقدمت منها ليالى وجلست بجانبها فهتفت زينب قائله: دى ليالى مرات فهد بجد زى ما بيقولوا كدا عوض ربنا لفهد وبنته بنت فى منتهى الاخلاق والاحترام والتدين
خديجه: حبيبتى ربنا يباركله فيها ويسعدهم يارب
انا بجد فرحانه لفهد جدا .
زينب: حبيبتى تسلمى يارب وعقبال ماتفرحى بادم
أدم : حلوه جدا الدعوات دى بس لو تخلعونى انا منها يبقى افضل
زينب: وليه بدرى انت ماشاء الله خلصت دراسه وبنيت مستقبلك
أدم : لان لسه بدرى جدا على الموضوع دا ، وكمان مفيش واحده يعنى خلتنى افكر فيها
أسماء: وانت ايه مواصفات فتاة أحلامك يا آدم
عدى بسخريته المعهوده : واحده تصبح عليه ببشله فى وشه وتنيمه معرقب رجليه
أدم : انت بتتريق
عدى : اصل انت ليك مواصفات غريبه
أدم : ليه يعنى انا عايز بنت تبقى محترمه وبنت ناس عادى يعنى وتبقى بنت جريئه وجدعه وفى نفس الوقت حلوه يعنى وفرفوشه كده
همس عدى لاسماء قائلا: دا بيتكلم عنك ، ومن موقعى هذا احب اقولك أن ادم ابن عمى هيرشق عندكوا
أسماء باستغراب: قصدك ايه ؟
عدى : افهمى بقا انتى ايه الذكاء دا معداش على سيستم المخ عندك خالص كدا
أسماء: انت بتتريق عليا
عدى : اخس عليكى انا اقدر دانتى حبيبتى
نكزته اسماء قائله: ماشي انا هاديه بس عشان مرات عمك وابن عمك ووالدك قاعدين
عدى : ما انا عارف عشان كدا قافشك هههههههه
اسماء: مااااشي ياعدى
ثم هتفت لادم قائله: بس ياادم طول ما انت مسافر معجبتكش اى بنت من بره يعنى كلهم عيون خضره وشعر اصفر وكمان الفرنسيات دول حاجه تانيه شياكه وكدا يعنى
أدم : هو انا هتجوز تابلوه هكلم واحده بالشوكه والسكينه
انا عايز بنت بلد مصريه لو تلفى الدنيا كلها متلاقيش فى جمال المصرية فى خفة دمها ودلعها وجمالها
بصي هى عمتا يعنى البنت العربيه اجمل بكتير من الغربيه
أسماء: فى ايه بقا ؟
أدم : تحسيها بنت لها قلب ومشاعر كدا تحسي باختلاف جمالها يعنى فيه البيضه وفيه الشقرا وفيه السمرا وفيه اللى عينيها ملونه وفيه اللى عينيها سمرا تحسي كل واحده باختلاف جمالها عن التانيه إنما الغربيه تحسيهم كلهم نمط واحد إلا قليل يعنى
وغير كدا تحسي العربيه بتعرف تتكلم وتضحك وتهزر أما اللى شوفته بره أن كل حياتهم عمليه وانا محتاج لواحده تطلعنى من جو الشغل لما ارجع البيت مش تبقى حياتها عمليه وروتينها زى روتينى
وكمان احلى حاجه في المصريه أنها زنانه ونكديه
أسماء: نعم !؟
أدم : اه زى مابقولك كدا تزن وتنكد على أقل حاجه وعايزه اللى يصالحها
أما بره معندناش مشكله تكمل حياتها عادى لوحدها طول عمرها ولو زعلتها ممكن تكبر دماغها وتنشغل بحياتها لوحدها وكمان الست المصريه جدعه وبتقف وتسد مع جوزها لوحصل اى موقف فى حياته
فهد: معايير غريبه بس وصف مش وحش يعنى اكيد انت من قعدتك بره وتعاملك عرفت مزايا احنا كمصريين أو كعرب ممكن نشوفها عيوب
أدم : بالظبط كدا .
عدى : متقلقش يا آدم عروستك عندى
أسماء: مين يا عدى !؟
عدى : فهد عارفها
فهد باستغراب: انا
عدى : ايوه الأمين عفاف اللى على سجن النسا
فهد : هههههههههههه ياشيخ حرام عليك دى مكومه سبع حريم وراجلين فى خناقه واحده
أدم : لا ياعدى ياحبيبي دا انا برده ابن عمك واخوك حبيبك
عدى : حبيبي دا انا بخدمك
أدم : حبيبي مستغنى عن خدماتك الله يسهلك
همست زينب لليالى قائله : امال فين ملك مش باينه
واحنا بقينا المغرب
ليالى : هى كانت خرجت تشترى لبس مع زميلاتها وان شاء الله زمانها جايه .
زينب: بس لما تجيلي على التاخير دا
ليالى : تحبي اجهز السفره دلوقتي
زينب: ماشي شوفى جهاد صحيها تنزل تسلم عليهم وتجهز معاكى
ليالى : حاضر
استئذنت ليالى وصعدت لجهاد ودلفت غرفتها لتيقظها فهمت جهاد واخذت حماما ينعشها وارتدت ملابسها ونزلت وسلمت على الجميع ورحبت بهم
زينب: الدكتورة جهاد بنتى يا ام ادم
خديجه: اهلا يا دكتوره . ماشاء الله زى القمر ياحبيبتى ربنا يحميكى.
جهاد: تسلمى يا طنط
سلمت جهاد على آدم بعد أن عرفته عليها اسماء
فرحبت به واستئذنت ودلفت تعد السفره مع ليالى وباقى العاملين في السرايا.
رن هاتف ادم بمكالمه ضروريه فاستئذن الجميع وذهب إلى الحديقه يتحدث فى هاتفه فشعر بحركه غريبه في المكان وصوت يصدر من بين الأشجار
فذهب ليرى ماهناك ليجد ملك تحاول تدخل المنزل من البوابه الخلفيه
فامسكها وهو يهتف قائلا: مسكتك يا حرامى ولكنه تفاجئ حين وجدها فتاه فظل يحدق لها قليلا فهى جميله جدا ملامحها لفتت انتباهه بشده ولكنه افاق على صوتها وهى تصرخ به ليتركها
أدم : يعنى حرميه وكمان مش عاجبك
ملك : هى مين دى اللى حرميه يا متخلف انت. انت مين اصلا ؟
أدم بغمز : وانتى مالك ومالى عايزه تعرفي انا مين ليه خليكي فى المصيبه إللى انتى عملاها الاول
ملك: مصيبه !؟
أمسكها ادم من ياقتها وهتف قائلا: تعالى انا هدخلك للعمده
دفعت ملك يده تهتف قائله: إيدك ياااض بدل ماتوحشك
أدم : ايد مين يابت انتى انتى مفكره نفسك مين دا انتى حتة حرميه وهوديكى فى داهيه
ملك : مين دى اللى حرميه يا عم وسع كدا. الله يخربيتك انت طلعتلى منين
أدم : من ورا الشجره
ملك : انت مجنون يااض انت يااض
أدم : يااض انتى يابت انتى عندك كام سنه
ملك : ليه هتطلعلى بطاقه ؟
أدم : يخربيت لماضتك
ملك : هااا انت
التفت ادم خلفه ليرى ما تشير إليه ولكنها غفلته وجريت سريعا وهى تضحك قائله: قديمه بس خالت عليك
عليك واحد .
بعد قليل خرج عدى ينادى لادم لتناول الطعام ودلف معه إلى الداخل