خرج فهد من الغرفه مع عمه سالم الذي كان يبتسم ويتحدث بهدوء قائلا: ايه يا عدى اتاخرنا عليك
استغرب عدى من طريقة حديث سالم معه فهو دائما يتحدث بأسلوب سئ معه
عدى : الحمد لله يا حج سالم
سالم:تحبوا تشربوا قهوة معايا ولا تشربوا ايه ؟
عدى : لا معلش اعذرنى انا ياحج انا لازم امشي عشان الحق اجهز شنطتى و اسافر
فهد: طيب ماتخليك ياعدى
ياعم لو عليا هأجل سفرى شويه وتبقى تحجز فى اى وقت تانى
عدى بتأكيد : لا انت لازم تسافر. لازم يافهد انا خلاص حجزت وهزعل منك والله لو ماسافرت
فهد: طيب خليك ونمشي سوا
عدى : لا مش هينفع وبعدين انا عايز ارجع انا اظبطلك حوار الاجازه ولما تيجى ياعم بالسلامه هجيلك هنا واقعد معاك يومين
فهد: طيب اللى تشوفه
عدى : عن اذنكم بقا همشي انا
فهد: استنى اتمشي معاك واوصلك . عن اذنك يا عمى
سالم: اتفضل يا حبيبي مع السلامه يا عدى
عدى : الله يسلمك يا حج سالم
ذهب فهد مع عدى يوصله إلى البيت الكبير فهتف عدى قائلا: هتركب الساعه كام يافهد ؟
فهد بعد الفجر بساعه كدا ولا حاجه
عدى : طيب تمام
فهد: طيب ما كنت مشيت معايا احسن ما انا كدا كدا همشي الفجر
عدى : لا معلش خلينى براحتى انت عارف انى لما بنوى على حاجه وبعمل حسابها مبعرفش اغيرها
فهد: طيب هتلبس ايه تسافر فيه انت جاى بالبدله متبهدله
عدى : لا ما انا نزلت اشتريت طقم كدا امشي فيه
فهد: معقول وعجبك حاجه هنا دا انت كل لبسك ماركات وبتقرفنا معاك على ما حاجه بتعجبك
عدى : كل حاجة فى بلدكم عجبتنى يافهد
فهد: غريبه انت بتتكلم كدا ليه ؟
عدى : لا ابدا اقصد يعنى اقولك أن بلدكم جميله
فهد: كل شبر فى مصر ياعدى له طعم خاص بيه
ابتسم عدى ونظر لفهد نظره طويله وابتسم قائلا: هتوحشنى ياصاحبي
فهد: مالك ياعدى ؟
عدى : ابدا ماليش هو انا يا ابنى عشان بسلم عليك يبقى فيه حاجه
تعالى بقا هطلع اغير الجلبيه اللى انت ملبسهالى دى الاول
ابتسم فهد على حديث عدى ولكنه شعر بقبضه بداخله
وصعد مع عدى حتى انتهى وغير ملابسه ونزل إلى السياره وجلس على مقعد السيارة ليقودها وهتف قائلا:
قولى يافهد هى اسماء بنت عمك عندها ايه
فهد: السكر
عدى : بس يعنى عادى انتوا ليه مكبرين الموضوع كدا مصر كلها بقا عندها السكر
فهد: الناس تفكيرها فى أن اللى عندها السكر دى مينفعش تتجوز وتخلف لأنها احتمال تخلف عيال عندهم السكر والمشكلة أن اسماء كانت بتتعب كتير ودايما الإسعاف كانت بتاخدها من المدرسه واتعرف فى البلد كلها أنها تعبانه وعندها سكر
عدى : ربنا يشفيها يارب
فهد: يارب
عدى : فهد انا لو رجعت البلد دى تانى أن شاء الله مش هرجع الا وانا جاى اطلب أيدها واتجوزها
فهد: غريبه لحقت ؟
عدى : اصل الحاجات دى بتيجى خطف كدا
فهد: وخطفتك ؟
عدى : طبعا رقتها وحنيتها وجمالها يخطفوا اى حد
فهد: ماتتلم ياااض
عدى : ههههه
فهد: وبعدين رقتها وحنيتها انت بتتكلم عن مين
عدى : عن اسماء بنت عمك
فهد باستغراب: اسماء بنت عمى !! ورقتها !!؟
عدى : ايوه طبعا انا عارف انها لمضه وأحيانا بتكون دبش بس محدش فاهم اللى جواها صح ولا حد عارف ان ورا دبشها دا جدعنه وورا ضحكتها دى رقه وورا كل حاجة ليها تفصيله تانيه
فهد: الله الله
عدى : مش بقولك خطفتنى
فهد: ههههههه انت هتقولى اسماء بنت عمى تخطف مدرعه بعساكرها
عدى : هههههه
فهد: طيب ما ترجع معايا
عدى : أن شاء الله هرجع بس مش دلوقتي
فهد: انت مالك قلبت على كريم عبد العزيز كدا ليه
اصحى يااض انت فى بلدنا مش فى فلسطين
عدى :ههههههههههه
هااا هتعوز حاجه ؟
فهد : سلامتك يا صاحبي
عدى : الله يسلمك
فهد : ربنا يجمعنا قريب. فى رعاية الله
ابتسم عدى قائلا: فى رعاية الله ولف وجهه عن فهد وانطلق بالسياره وعلى وجهه ابتسامة تخفى ما بداخله