مر اسبوع على تلك الأحداث ومازال عدى فى المستشفى
واسماء لم تتركه فهى تقريبا كل يوم معه
واليوم هو يوم خروج عدى من المستشفى وسيتم تركيب ساق صناعيه له
كان الجميع يشعر بالقلق والتوتر ومن ردة فعله فهو بالرغم من تقبله بالأمر إلا أنه لم ينهض ويخرج بهذا الوضع الجديد كليا عليه
كان عدى يحاول أن ينهض مع فهد وباقى الممرضين والطبيب ولكنه كان بداخله يشعر بالعجز فليس سهلا على إنسان أن يفقد أحد أطرافه ليس سهلا على شخص كان يحب عمله بشده ان يكون قعيد يريد من يسانده ويتحمله
كانت الدموع تلمع بعين عدى وشعر كل من حوله بوجعه والمه .
هنا دلفت اسماء وهى تهتف قائله: صباح الخير
ايه دا عدى هيخرج النهارده ولا ايه ؟
الطبيب: اه أن شاء الله يا انسه اسماء
اسماء: هو مش المفروض كان لسه قدامه كمان يومين
عدى بعصبيه :عجباكى قعدتى فى المستشفى
شعرت اسماء بوجعه وفهمت مايعانيه الان فهتفت قائله: بصراحه اه كانت عجبانى
نظر لها بغضب زال سريعا وتحول الى ابتسامه انسته مايمر به الآن حين هتفت برقه وغمزه من عينيها قائله: ايه وانت مكانتش عجباك القعده فى المستشفى
خلاص هتروح وانا هرجع البلد ومش هتشوفنى تانى ولما اشوف مين بقا اللى هيجى يضحكك كل يوم يا بارد
عدى بسخريه : يضحكنى كل يوم ليه هتجوز اراجوز
اسماء: ياااض اتلم
عدى : اتلمى انتى بدل ما اقوملك
همست اسماء فى أذنه قائله: قوملي عيزاك تقوملي ياعدى
وتقف وتشد حيلك عشان نومتك دى قتلانى
التفت عدى ينظر فى عينيها ليجد حب العالم كله بهم
فهتف قائلا: اسماء احنا لازم نتجوز انا مش هقدر اعيش يوم وانتى بعيده عنى
ابتسمت اسماء قائله: طيب يلا شد حيلك بقا وقوم عشان نتجوز
ابتسم فهد على هذا الثنائي قائلا: طيب وبعدين اطلب اتنين ليمون ولا هنقوم عشان نروح من هنا
زمجر عدى قائلا: هادم اللذات ومفرق الجماعات
فهد : طيب يلا يا اخويا قوم وساعدنا وشد حيلك يا بطل
نهض عدى وبدأ الطبيب في تركيب الطرف الصناعى
حاول عدى أن يسير ولكنه كاد أن يقع فمنعه فهد من الوقوع أرضا قائلا: شد حيلك يا صاحبي
ابتسم عدى وبدأ بالسير بطيئا يستند على عكاز
اسماء:لو سمحت يا دكتور عايزه اعرف ازاى بيتركب وازاى بيتشال ولو فيه تمارين هيعملها
الطبيب: متقلقيش يا انسه اسماء هتعرفى كل دا ولسه فى جلسات هيعملها وبعدين هتلاقوا كل حاجة سهله بعد كدا بس هو على ما يتعود
هنا دلف سالم ومعه محمود المنياوى والد عدى
هتف سالم بفرحه قائلا: ماشاء الله البطل قام اهوه
عدى : الحمد لله ياعم سالم
والد عدى : ازيك يا موكا
اسماء: ازيك انت ياعسليه
عدى بغيره : عسليه. هو مين دا اللى عسليه
ضحك محمود قائلا: انتى اللى احلى عسليه يا موكا
عدى بسخريه ونفاذ صبر : فهد مش كنت هتطلب اتنين ليمون هاتهم للحج والعسليه اللى معاه
ضحك الجميع على عدى وطريقته وغيرته الواضحه على اسماء
هتف محمود المنياوى قائلا: حج سالم انا بطلب منك ايد اسماء
شهق عدى بصوت عالى قائلا: وكمان بتطلب أيدها قدامى
اوعى توافق يا حج سالم بنتك هتتبهدل وتعيش تعانى باقى عمرها عيلة المنياوى دول عيله جبابره
محمود : يابنى اصبر انا بطلب أيدها عشانك
عدى: عشانى ! وافق يا حج سالم يازين ما اخترت عيلة المنياوى يعنى الجدعنه والطيبه والحنيه
فهد: تقريبا كانوا جبابره من شويه
نكزه عدى فى صدره قائلا: اسكت انت
سالم : وانا موافق يا محمود بيه
محمود المنياوى: يبقى نكتب الكتاب
سالم: بسرعه كدا
محمود المنياوى: عدى هيبقى محتاج لاسماء الفتره الجايه
سالم : بس اسماء لسه بتدرس
محمود المنياوى: وايه المشكله تكمل عندنا
سالم: اللى تشوفه اسماء
نظر عدى لاسماء ينتظر ردها فصدمته قائله: لا ياعمى انا مش موافقة
شعر عدى بدقات قلبه تتسارع باختناق ولكنه هدأ حين هتفت اسماء قائله: مش هوافق غير لما عدى يشد حيله ويقوم يمشى لوحده والاقيه جاى يطلب ايدى بنفسه زيه زى اى عريس وانا اعمل متفاجئه بقا واقعد اتشرط عليه
ضحك محمود وسالم
ولكن هتف عدى قائلا:ما انا يا اسماء عشان اعمل كل دا لازم تكونى جانبي
ابتسمت اسماء واخفت دموعها قائله: خلاص يبقى كتب كتاب ولما تشد حيلك نتجوز
ابتسم عدى قائلا: وانا موافق
سالم: بعد اذنك يا محمود بيه
محمود :محمود بيه ايه بس ياحج سالم. قولى يامحمود ولا اقولك قولى يا حج محمود
ابتسم سالم قائلا:ماشي ياحج محمود
بس انا كنت عايز اخد عدى البيت عشان ام اسماء تراعيه وكمان يبقى مع العيله هناك
محمود: والله فكره حلوه ايه رايك ياعدى
أومأ لهم برأسه ثم غمز لاسماء خفية قائلا بعدم اهتمام : اللى تشوفوه
هتفت اسماء بهمس لم يسمعه غيره قائله: نيتك شمال
اخفى عدى ضحكته
وهتف الطبيب بعد أن دلف لهم مره اخرى قائلا : يلا يا عدى عشان دكتوره نادين هتجهزك وتساعدك بتمارين بسيطه انك تمشي بسهوله
التفتت اسماء وعدى والجميع إلى دكتوره نادين لتجدها امرأه تخطت سن الثلاثين ولكنها صارخة الجمال ترتدى بنطلون ضيق وبدي حماله والبالطو الابيض وتلك الخصلات الشقراء المتمرده وتضع الكثير من مساحيق التجميل
هتف عدى قائلا : اللهم صل على النبي ( صلى الله عليه وسلم)
هو دا الكلام أنا موافق يا دكتور اقوم امشي
نظرت له اسماء بغضب ثم هتفت قائله: وهو مافيش حد يساعده غير الصاروخ ارض جو دى
ابتسم عدى ليثير غيرتها قائلا: اسماء لو تحبي تروحى انتى او تحبي تنزلى تشربي حاجه على ما اخلص الجلسه مع القمر
اسماء: بقا كدا طااااايب ياعدى ايه رايك بقا مش نازله وعلى قلبك انا هه
محمود لسالم : طيب تعالى نقعد بره احنا ياحج اصل الجو شكله اتكهرب
سالم : ههههههههه اتفضل
وبعد قليل دلفت ليالى لتجد هذا الوضع وذلك الصاروخ يقف أمامها
فألقت التحيه قائله : السلام عليكم ورحمه الله
الجميع: وعليكم السلام ورحمه الله وبركاته
ليالى : ازيك يا عدى النهارده ؟
عدى : الحمدلله زى الفل انا من دقيقتين بس حالتى اتحسنت خالص
ذهبت ليالى باتجاه فهد الذي حاوطها بذراعيه فور وقوفها بجانبه تهتف قائله: هو فيه ايه ؟
اسماء: ولا حاجه يا اختى سلامة نظرك
هتفت الدكتورة قائله:
انا مبسوطة اوى يا عدى باشا انى هتابع حالتك انا سمعت عنك وعن فهد باشا كتير وعن بطولاتكم
اسماء: ياعينى
نادين : نعم !؟
اسماء: لا ياحبيبتي كملى اصل بتأثر بسرعه ترانى ابكى
نادين : حضرتك عندك إصابات في اى اماكن تانيه
اسماء: ود ليه أن شاء الله
نادين : لازم اسجل عندى واعرف إذا كان فى إصابات ولا لا عشان العلاج وتشخيص الحاله
اسماء: اممممم
عدى : فيه إصابات سطحيه عاديه يعنى متقلقيش انا زى الفل
زمجرت اسماء وذامت بصوت عالى. ليهتف قائلا: مالك هتعضى ولا ايه؟
نادين : الف سلامه عليك. حضرتك مرتبط يا عدى بيه
اسماء: والسؤال دا برده عشان تشخيص الحاله والعلاج
نادين: لا دا سؤال عادى
عدى : يابنتى سيبينى اخد فرصتى
نكزته اسماء وهتفت قائله: اه يا حبيبتي مرتبط انا خطيبته
نادين : والله مبروك
اسماء: الله يبارك فيكى عقبال ولادك ياطنط
نادين :طنط !! ؟ واولاد مين انا مش متجوزه
عدى : حلو
نظرت له اسماء بغضب وهتفت قائله: ياعينى فاتك قطر الجواز معلش بكره ربنا يعوضك ياحبيبتى
هزت نادين رأسها باستغراب وهتفت قائله: طيب انا هروح اجيب الشنطه بتاعة الاجهزه وراجعه تانى
اسماء: بالسلامه ياحبة عينى وخدى الباب وراكى
كان فهد يقف في مكانه وبجانبه ليالى يمنعون صوت ضحكتهم بصعوبه وبعد خروج الدكتورة انفجروا بالضحك