حمدان: مدري يايبه بس ما هضمت ان عمي تنازل عن حق بنته عشان يزوج احمد رهف !؟ اصلا احمد وشلون يرضى !
ابو حمدان: يعني شلون!؟
حمدان: انا اقول لها امرين ؟ الاول انهم كشفوا ان ريناد غلطانه وبيسترون على الموضوع ! والثاني انهم بيكسرون كلام نمر ويطلعون رهف من تحت شوره بما ان الكل يدري رهف عيون نمر
سكت ابو حمدان بس قال: ماهقيت ! اظن انهم عرفوا بغلط ريناد اكيد انها سوت شي
حمدان: وللله يبه مدري بس مادامه كذا خذ رأي رهف ونشوف
ابو حمدان: بنشوف
وقف وطلع وركضت هدى وهي تاخذ جوالها واتصلت بأم حمدان وهي تبلغها باللي صار وانهبلت ام حمدان( وشلون يرفض احمد عشان نمر ) وهذا عندها من سابع المستحيلات وصارت من صف احمد وابو فهد وهي تتوعد ما تتزوج رهف الا احمد وهذا هو اللي تبيه
………………••…………
وفي بيت ابو حمدان
طلع نمر لشغله بعد ما ترك البنات مع الهنوف وهو يشوف انهم مبسوطين مع بعض وملاحظ اثير الصامته من اول ماجلسوا لكن بدت تدخل معهم شوي شوي
لكن وقف وهو يناظر السياره اللي كلها اغاني ووقفت ونزلت عدنان اللي نزل يضحك لكن اختفت ضحكته من شوفة نمر ووقف مبتسم بخوف : صباح الخير يا كابتن
نمر : صباح النور!؟ من وين جاي!؟ هالساعه!؟