■■■
” بعد مرور خمسة أسابيع “
يتوسط مكتبه الخشبي الكبير وأمامه مجموعة من الأوراق يتفتنهم بعناية ، دلف أكرم بفرحة قائلًا
– وكدة خلصنا من أكبر شحنتين واسمنا سمع والطلبات علينا مش ملاحقينها ..
رفع زين عينه برزانة وثبات مردفًا
– تمام .. فريدة رشوان استلمت شحنتها !!
جلس أكرم أمامه بتلقائية مرددًا
– كله ميت فل وعشرة ياهندسة .. إنما أنت مطلعتش سهل أبدًا ، أنت عملتلها إيه عشان تطويها تحت جناحك كدة !!
التوى ثغره جنبًا بابتسامة ساخرة وهو يتكئ للخلف قائلًا
– الستات دول كلهم عجينة واحدة ، طول ماأنت عارف تشكلها صح هتكسبهم كلهم ..
هلل أكرم بإعجاب قائلًا
– والله يابني أنت مدرسة .. ما تعلم أخوك أي كلمتين كدة .. دانا بنت الجيران ساكنة قدامي ١١ سنة يازين مش عارف ألفت نظرها ..
أجابه بسخرية
– عشان غبي ، الستات مش عاوزين لفت نظر .. دول عاوزين بلطجي يهجم على حياتهم ويملكها ، عمر ما واحدة ست هتحبك وأنت متكتف ومقضيها نظرات ، ادخل عليهم بقلب جامد ومهما كان عنادها وتمردها يومين بالكتير وهتلاقيها بين إيديك يامعلم .
أطرق أكرم بأسف
– عارف الفرق بيني وبينك إيه !! إني بدور على الاستقرار والأبدية مش علاقة ليلة وأقلب ، وعمري ما هابقى مبسوط وأنا جابر واحدة على الحب ، الحب لو مخطفهاش ليا من أول نظرة نبقى مش لبعض ، شعور إنك تايه بتدور على حبيبك واللي منك وفجاة قلبك يلتفت لنصك الثاني اللي ضايع منك من زمان هو دا الحب اللي بيبدأ بنظرة وينتهي بحضن ومش العكس اللي بتتكلم عنه أنت حطب مش حب هو اللي يبدأ بحضن وتكسير وعفويو وينتهي بنظرة مشتعلة بنار الندم والحسرة .. فهمتني !!