#فلاش بااك .
– بتبصيلي كدة ليه ؟؟تكونيش وقعتي في حبي ولا إيه ؟
_طيب ماتقولي هو يعني إيه حب الأول ؟
* بصي ياستي .. أمي كانت بتقول لي إنها مشاعر مستحيل تتكرر تاني ، بتيجى مرة واحدة في حياة الواحد مننا مع شخص واحد بس أما الباقي فبيكون تعويض .
_طيب هو عيب إننا نحب يازين ؟
* مش عيب خالص ع فكرة ، الحب فطرة وغريزة .. والدنيا دي أصلاً اتبنت على الحب لولاه مكنش آدم وحواء هيعرفوا يعيشوا مع بعض ..
_أومال ليه بيخوفونا منه .. ليه كل اللي بيروحله بيوجعه ؟
*ممممممممممممممم .. كنت
قريت حاجه ل ابن القيم قال ما في الحب شيء .. و لا على المحبين سبيل .. إنما السبيل على من ينسى في الحب دينه .. أو يضيع خلقه ، أو يهدم رجولته ، أو يشترى بلذة لحظه في الدنيا ألف سنة في جهنم .. يعني الخوف مش من الحب .. الخوف من الشخص اللي هيحب ..
رمقته بنظرات إعجاب وانبهار فأردف زين ممازحًا
” ما قولت بلاش تبصيلي كدة .!! ولا أنتي مش ناوية تجبيها لبر “
ابتسم ابتسامته الساحرة التي جعلتها تغرق به من أول نظره ثم قال بفضول
*ممكن أعرف أنتي حاسة بإيه وأنتِ معايا ؟
بدى عليها الارتباك والتوتر البالغ وهى تبعد عينيها عن أسهم نظراته ثم قالت بهدوء
_حاسة إني بقيت أنانية أوي .. زي مايكون في إيدي جوهرة غالية ونادرة أوي .. كل ما أبصلها بتحلو أكتر وأكتر .. مش بستكفى منها حتى ولو كانت قدام عيني ليل نهار .. وأنت كدة مهما قعدت معاك مش بستكفى .. كل ماأقربلك بحبك أكتر يازين ، أنت جيت متفصل على مقاس أحلامي بالظبط ..
سحب نفسًا عميقًا محاولًا استيعاب كلامها أردف وهو ينصب عوده باهتمام
*استني بس أنتي قولتي إيييه ؟؟ عاوز أسمع تاني عشان شكلي سمعت حاجة غلط!!