ـ أول بس ما ذكر إن وراها مسابقة، على الفور لبسنا أنا وأبوه نجيبه يحضر.. أيوة أمال إيه؟ دا إحنا عينينا الاتنين فدا نجم المدرسة للسنوات القادمة!
ببرود منقطع النظير، قابلت تولين الكلمات بابتسامة سمجة، ثم تجاهلتها تماماً لتوجه حديثها إلى حمزة:
ـ ريان عنده إحساس عالي جداً بالخطوط، والنهاردة أنا طلبته عشان نختار الرسمة اللي هيدخل بيها المسابقة الكبرى، و…
توقفت برهة ثم شملته بنظرة فاحصة نحو الملابس العصرية التي يرتديها، لتعلق بمرح:
ـ بس واضح إن الموضوع وراثة، ذوقك أنت كمان يا مسيو حمزة باين من اختيارك لألوان لبسك المتناسقة الجميلة.
تفاجأ حمزة بإطرائها، ليلتفت على الفور بقلق نحو زوجته التي اشتعلت عيناها وتحفزت للانقضاض على تولين كأنها لبوة شرسة، ليسارع هو بمنع وقوع جريمة، ويهتف وهو يسحب زوجته من يدها:
ـ أنا بقول اتأخرنا، نمشي أحسن.. ياللا بينا يا مزيونة.
عارضته الأخيرة بجنون وهي تحدج تولين بشرار عينيها:
ـ وليه نمشي والبرنسيسة ابتدت بلبسك؟ مش لما نشوف هتوصل لحد فين؟ والله شكلها البت دي قاصدة تغيظني!
تبسم حمزة وقد تمكن من إخراجها من غرفة المرسم:
ـ معلش سيبك منها، هي كأنها بالفعل عجبتها اللعبة “مضروبة الدم” وقاصدة تشوف رد فعلك.