ـ اللهم لك الحمد ولك الشكر، تسلم إيدك يا معاذ، الحمام طعمه يجنن، إنت جايبه من أي محل؟
ضحك المذكور وهو يقوم برفع الأطباق والمتبقي عليها من الطعام، يجيبه بتفاخر وهو يتحرك نحو المطبخ:
ـ أنا مجبش من محلات يا غالي، هي الست الوالدة ربنا يخليها لي، بتجهز وتجمد لي في كل سفرية آخدهم معايا وأنا مسافر، أخزنهم في الثلاجة عندي هنا وأطلع أسويهم وأحمرهم بس كدة.
ـ يا سيدي ربنا يخليها لك يا رب، الستات الكبيرة دي كنز كبير للي يعرف قيمتهم.
ـ اللهم آمين يا رب.
تمتم معاذ وهو يقترب ليرفع باقي الأطباق، ليضيف بصدق وجدية:
ـ ومعرفة الصاحب الجدع كمان كنز، أنا لا يمكن أنسى جدعنتك يا عثمان ويعز عليا قوي إنك تبقى شايل مني.
أومأ الأخير ببعض اللين:
ـ إنت زي أخويا الصغير يا معاذ، وعمري ما أشيل منك بس…
توقف عثمان ليحثه الآخر:
ـ بس إيه يا عثمان؟… كمل يا صاحبي، أنا عارف بالكلام الداير ورا ضهري إني ليا واسطة في الإدارة أو إن ليا علاقات، وربنا وحده اللي عالم إنه مجرد كلام.
قاطعه بها، ليردف بعدها بصدق ما يشعر به:
ـ أنا سايبهم يقطعوا في فروتي براحتهم، ويألفوا في إشاعات، محدش فيهم يستاهل إني أوضح له غيرك إنت يا عثمان، لأن إنت بس اللي تهمني…