– أيوه هو ، بس ده سايب الشرطة وفاتح حاجة كده زي شركة للكمبيوتر أو إتصالات، مش فاكره يعني …
تراجعت “هدى” بملامح منصدمة ..
– إيه ؟!!!!! هو في حد يسيب الشرطة ويفتح شركة ، ده غريب أوي !!!
أخفضت “أميرة” صوتها حتى لا ينتبه لها أحد …
– ما هو إللي حصل له خلاه يسيب الشرطة ويقفل من الدنيا كلها ..
ضحكت “هدى” بسخرية وهي تناظر “بدر” الذي يغازل هذه وتلك …
– مش باين عليه قافل يعني …!!
رفعت “أميرة” حاجيبها وهي تشعر بخيلاء لما تمتلكه من معلومات عن “بدر” لتسترق عيون صديقاتها وآذانهم لتقص لهم ما تعرفه عنه بطريقتها المشوقة …
– إنتِ ما تعرفيش حاجة، ده من حوالي سنتين كان شغال على قضية تهريب وكان فيه بنت أظن إسمها … “شيماء”، “أسماء”، حاجة زي كده، المهم، البنت دي كانت شغاله معاهم زي مرشدة ليهم عشان يوقعوا الناس دول، حبها أوي وفعًلا قدرت تجيب كل المعلومات إللي توقع العصابة دي، بس لما إتقبض عليهم كان لسه فيه ناس بتساعدهم متقبضش عليهم، وكانوا عاوزين ينتقموا منه، عرفوا إن هي إللي بلغت عنهم خطفوها وهددوا “بدر” إنهم حيموتها، “بدر” بقى حاول ينقذها بس قبل ما يوصل لها الراجل فجر المكان بـ إللي فيه …
شهقت “هدى” بصدمة …
– و ماتت ؟!!!!!!!