قوست “بيسان” شفتها السفلية بإستياء وهي تتهكم من والدتها التي لم تحاول رؤيتها منذ أربع سنوات كاملة …
– وحشاكِ !!!، مامي أنا بقى لي أربع سنين مشفتكيش من آخر مرة جيتي فيها الفيلا و دادي مرضيش يدخلك ..
بندم شديد وتأثر بالغ ظهر بنبرة صوت “أشجان” التعيس …
– غصب عني باباكِ طردني ومش عاوزني أقرب منك ولا أكلمك حتى …
عقدت “بيسان” ذراعيها أمام صدرها وهي تتجهم بوجهها بقوة …
– مامي إنتِ عاوزة مني إيه ؟!!! علشان لو دادي عرف إني جيت وقابلتِك حيزعل أوي …
بعتاب حنون لم تعتاده “بيسان” من والدتها التي لم تحنو عليها يومًا إستطردت “أشجان” …
– جايه أطمن عليكِ، إيه مش عايزة تشوفي مامي ولا إيه !!!!
– وأنا جيت يا مامي عايزة حاجة تانية ؟!!!
مطت “أشجان” شفتيها قبل أن تتحول نبرتها لإستعطاف شديد مرتدية قناع الخديعة لتلك السطحية الساذجة …
– يرضيكِ إللي باباكِ بيعمله معايا ده، سايبني للشارع كده، ده أنا حتى عيانه أوي ومش لاقيه فلوس العلاج …
إستطاعت “بيسان” فهم سبب إلحاح والدتها على مقابلتها سرًا، فهي ذكية للغاية، ربما تبدو فتاة مدللة من ظاهرها لكنها ليست بتلك السذاجة التي يعتقدون أنها تتحلى بها، أدركت على الفور السبب الحقيقي وأن هذا ما هو إلا قناع مزيف يتسم بالطيبة والقلق والإشتياق، قناع لم يقنعها بالمرة …
– إنتِ جاية عاوزة فلوس مش كدة ؟؟!!!! للأسف يا مامي مش حقدر أديكِ حاجة لأنك عمرك ما إديتيني حاجة أقدر دلوقتِ أساعدك بالمقابل، عارفة لو كنتِ بتحبيني وبتخافي عليا وفضلتي معايا كان ممكن دلوقتِ أديكِ عمري كله …