حاصرتها هويدا بالأسئلة الملحه مزامنه مع رغبتها فى الحديث وبث أحزانها لصاحبتها علها تستريح ولو قليلا من عذابها
علياء: أنا و حنان أخت إياد كنا أصحاب أوى من أول سنه دخلنا فيها الجامعه وبقت علاقتنا بتزيد
مع الأيام
كانت تيجى ساعات تزورنا وانا كمان كنت احيانا أزورها
إياد كان لسه متخرج وبيعمل دراسات عليا
كان متفوق وطموح أوى رغم ظروفه المادية البسيطة
إحنا وقتها كانت ظروفنا كويسه جدا وبابا كانت تجارته بتزيد وكل طلباتى كانت مجابه
كان بابا الله يرحمه بيتعمد مايرفضليش طلب دلعنى بزياده أوى عشان يعوضنى عن بُعد ماما لحد ما بقت شخصيتى أنانية ومغرورة واهم حاجه عندى المظاهر والفلوس…
قاطعتها هويدا باندهاش: أول مرة اشوف واحده بتقول كده على نفسها؟!!! بس انتى مش كده دلوقتي ياعلياء بالعكس من يوم ما عرفتك وانتى شخصية جميله ومحترمة
ابتسمت علياء ابتسامة يائسة: العجيب لما كانت شخصيتى مش كويسه كان اياد بيحبنى ولما اتغيرت
وربنا هدانى كرهنى ومعدش طايق يبص لى
ازدادت حيرة هويدا وسألتها بفضول: ليه ؟! هو ايه اللي حصل بعد كده؟!!
اجابتها علياء:
إياد عرض على اخته انه كل أسبوع فى اجازته يقعد
معانا ويشرحلنا اللى مش فاهمينه ويساعدنا فى التكليفات والامتحانات
وفضلنا على الحال ده سنتين كنت بحس من نظراته
انه معجب بيا
لحد ما جه فى يوم واعترفلى بحبه وانه بيحلم يتجوزنى وانه هيسافر ويشتغل عشان يقدر يكون نفسه و يقدر يعيشنى بعد الجواز فى المستوى اللى انا متعوده عليه
هتفت هويدا بدهشة: كل ده كويس؟! فين بقى المشكلة؟!!
زفرت علياء بحزن ولمعت فى عينها الدموع وقالت:
أنا المشكله…
وقتها كنت تافهه وتفكيرى سطحى أوى ومغرورة بشكلى واعجاب الشباب بيا
فكان بالنسبة واحد معجب زى غيره اللى بفضل اغيظ بيهم البنات واعقدهم وكمان كنت بستفز بيه فارس عشان يغير عليا..؟غير انى كنت بستفيد منه
وبيساعدنى كتير فى دراستى فاضطريت إنى اجاريه واوهمه بالحب وانى هستناه لحد ما يرجع
وفعلا سافر وبدأت أبعد شويه شويه عن أخته
عشان كانت بتنقله اخبارى و قتها كنت معجبه
بفارس زميلى فى الكلية كان من عيله كبيره وشايف نفسه دنجوان الجامعه وكل البنات التافهه بتجرى وراه
طبيعى من واحده كان تفكيرها ساذج زيى انها تفرح
انه معجب بيها وساب بنات الجامعه كلهم وفكر فيا أنا
اتعلقت بيه جدا مش بس هو …واتعلقت بحلم انى
هتنقل لمستوى تانى أعلى من مستوانا
ووصلت بيا الحقارة انى كنت بستغل إياد عشان اخلى فارس يغير عليا وبفضل افرجه على الرسايل اللى بيبعتهالى ونفضل نضحك ونتريق عليه