خرج صبحي من غرفته مهرولا على صوت الشجار
صائحا بفزع : خير يا دكتور ايه اللي حصل؟
التفت له ومازال الغضب مستعمرا ملامحه بقوه:
البنت دي إيه اللي نيمها في مدخل العماره وأردف بنبره تهديد وياتري
صاحب العماره عنده علم بوجودها؟
همس صبحي برجااااء وتوسل : لا…. بلاش الله لا يسيئك يا دكتور ما تجيبله سيره
ده راجل مفتري وممكن يقطع عيشي من هنا …
وان كان على البت دي انا هطردها ومعدتش هتقرب من باب العماره تاني بس عشان خاطر ربنا بلاش تأذيني في لقمه عيشي
احس معتصم أن الأمر سار على نحو لا يتمناه فبرغم كل ما قالت بقى بداخله شيء من شفقه عليها ورغبه في إبقاءها بأمان..
ضاعف شعوره بالضيق مرئاه لدمعاتها التي جرت علي خديها بغزارة رغما عنها فاوجعت روحه ولا يدري ما السبب؟!
حتي انساه انشغاله بها أنه ينبغي عليه الإسراع حالا بالذهاب للمشفي لاسعاف الحالات المصابة
التفت معتصم نحوه وقال بصوت اكثر هدوءا عن ذي قبل: أنا بسألك سؤال وعايز إجابة هي نايمه هنا ليه؟
فين أهلها؟
هز صبحي كتفيه وقوس شفتيه وأجاب قائلا : والله ما انا عارف جبهالي بواب صاحبى الصبح وقالي انها غلبانه ومنكسره ومحتاجه القرش لو تعرف شغلانه ليها وتاخد فيها ثواب…لكن انا مااعرفش عنها حاجة
ولما نزلت من عند حضرتك بالليل خرجت من العماره وبعد ساعتين سمعتها بتصرخ اتاري شباب ولاد حرام كانوا عايزين يخطفوها في عربيتهم لما لاقوها قاعده علي الرصيف لوحدها
ولما صرخت والناس أخدت بالها جرينا عشان نلحقها
سابوها وركبوا العربيه وهربوا
حتي واحد ربنا ينتقم منه عورها بالمطواه في ايدها قبل ما يهرب
بصراحة صعبت عليا قولتلها خليكي هنا لحد الصبح…
ادي كل الحكاية يادكتور
استدار نحوها فوجد عينيها حمراوتان بشده من البكاء مد يده وامسك يدها المصابه ونزع قطعه القماش الملوثه عنها
وهي تنظر إليه بانهاك دون مقاومه
رفع عينيه إلي عينيها ثم قال معاتبا:انتي بتهزري؟
جرح زي ده حضرتك ربطاه بقماش! مالحظتيش انه لسه بيزف؟ ده محتاج خياطه حالا
تعالي معايا عشان يتخيط… انا رايح دلوقتي المستشفى
وجدها واقفه كمان هي متصلبه الملامح ولم تبدِ اي اهتمام او استجابة لحديثه مما اثار غيظه من جديد
وصاح بحنق: يلا يااستاذه انا مش فاضي المفروض اكون هناك في اقرب وقت في ناس مصابه محتاجين اللي يسعفهم… خلصينا
اجابته بعناد واصرار : انا زينه يا دكتور اتفضل شوف المصابين بتوعك انا بخير الحمد لله الموضوع مش مستاهل