رواية في مدينة الاسكندرية الفصل الثاني والثلاثون 32 بقلم صابرين – للقراءة المباشرة والتحميل pdf
-يخربيت النفخة الكدابة
رفعت براءة عليها كيس الكريمة وكأنها ترفع عليها سكينًا ثم هتفت بتهديد قائلة :
-بعرف اعملها ولا مش بعرف
-لا يا ستي بتعرفي بس بصراحة معرفش عمايلك حلوة ولا لأ علشان مدوقتش حلوياتك دي
عقدت رقية حاجبيها بتعجب وهى تفتح كيس البسكوت حيث يحتوي على قطع صغيرة دائرية سوف يزينوا بها الكيك :
-انتي مش بتاكلي حلويات رمضان يا نور؟!
ونفت الأخرى بهزة بسيطة من رأسها فقالت رقية بتعجب مضاعف وكأنها تستمع لشئ خارق للطبيعة :
-يعني مش بتاكلي القطايف؟؟
-طب البسبوسة أو بلح الشام أو صوابع زينب والحاجات الحلوة دي
-ولا الكنافة المحشية أو السادة؟؟
-لأ السادة بس بحبها ومليش تقالة عليها قوي
-ولا حتى بالمانجا؟!
-لأ انا اصلًا مش بحب المانجا في كل حالاتها
أشارت رقية إلى الكيك ثم قالت :
-طب والكيكة أعتقد بقى مفيش حد مش بيحب الكيك
أشارت نور إلى نفسها ضاحكة :
-انا مش بحبها بحسها تقيلة
-حتى لو كانت سادة أو بالشوكولاتة؟!
-لأ دي ولا دي ومليش في الشوكولاتة قوي يعني قطعة صغيرة حلوة عليا مش أكتر
ضحكت براءة بقوة على صدمة رقية الواضحة والتي كانت تتطالع نور بريبة وكأنها كائن غير بشري :