رواية في مدينة الاسكندرية الفصل الثامن والثلاثون 38 بقلم صابرين – للقراءة المباشرة والتحميل pdf

ضحكت بشكل مفاجئ وهى تقطم من الشوكولاتة في يدها ثم قالت :

-انا بشفق على اللي هيتجوزها يونس مستقبلًا علشان هو ملوش أبدًا في الحاجات دي ولا بيعرف يجيب هدية ولا يقول كلام حلو وكمان عصبي، سبحان اللي خالقكم توأم في الشكل بس شتات في الشخصية

ابتسم يوسف بسمة جانبية ظهرت على جانب ثغره ثم صمت صمت غريب فقالت رقية متسائلة :

-سكت كده ليه؟؟

تنهد الآخر ثم قال :

-يونس مخنوق ومتضايق بقاله كذا يوم، انتي هتتجوزي وانا برضو هتجوز ويونس هيبقى لوحده، انا حتى لو هبقى فوقه بكام دور برضو هيحس إنه لوحده

همهمت رقية بتفهم فيونس مزاجه متغير هذه الأيام لهذا السبب :

-فعلًا معاك حق لازم نشوفله عروسة، بس تفتكر هيوافق بجوازة الصالونات؟؟

-هو مش هيوافق بالجواز على الوجه العام علشان لسه معملش موف أون من العلاقة الأولى

أخرجت رقية صوتًا ساخرًا من فمها ثم قالت :

-ست سنين ومعملش موف أون وخلاص داخل على التلاتين هيستنى الأربعين ولا ايه؟!

توقف يوسف بسيارته أمام المحطة ثم قال :

-أهو أمك كل ما تكلمه في الموضوع ده يقول لسه بدري وبابا اتجوز وهو عنده تلاتة وتلاتين سنة

نظرت رقية للخارج نحو المحطة وقد غيرت مجرى الحديث إذ قالت :

-هى براءة تعرف إنك جاي توصلها