«سالم» بمرارة
_ للأسف دا ابتلائنا من زمان ، و احنا على قد ما نقدر بنحاول ننقذ نفسنا و ننقذ اسم العيلة من شره .
«نعمة» بتأثر
_ ربنا يعينكوا يا ابني ، و يعينك انت بالأخص حملك تقيل .
_ الحمد لله على كل حاجه . المهم عايز اتكلم معاكِ في موضوع ، و اتمنى متتخضيش ، و تركزي معايا و تفهمي اللي هقوله . عشان الغلطة عندنا بفورة .
«نعمة» بترقب و قد اقلقتها كلمات «سالم»
ـ قول يا ابني سمعاك .
«سالم» بخشونة
_ ناجي مش هيسكت على اللي حصل ، و في الأغلب هيحاول يستغل اللي حصل دا في مصلحته ، و اكيد هيحاول يتواصل مع البنت اللي فوق دي ، و عشان يعمل كدا عايز حد يكون من البيت ، و يكون موثوق فيه من جهتنا .
تنبهت «نعمة» لحديثه وقالت بريبة
_ تقصد ايه ؟
«سالم» بجمود
_ وارد أنه يحاول يتواصل معاكِ ، و يضغط عليكِ عشان تساعديه .
هبت« نعمة» من مجلسها وهي تقول بقهر دفين
_ أساعده ! بعد ما قتل جوزي و حرق قلبي عليه أساعده ! دانا لو طايله اكله بسناني هعملها.
اومأ برأسه قبل أن يقول بهدوء
_ طب اقعدي يا حاجه . خلينا نكمل كلامنا.
جلست« نعمة» بوهن بعد أن هاجمتها ذكريات الماضي الأليم و نبشت كلمات« سالم» جرحها الدفين فتابع الأخير بهدوء
_ اللي جاي صعب ، و أنا عارف قد ايه أنتِ بتحبي البيت دا و اللي فيه ، و عشان كدا هطلب منك تساعديه .