شهقت «شيرين» بفزع
_ قتل جوزها ! انا مش قادرة اتخيل أنه بني آدم . طب و انتوا اتأكدتوا ازاي أنه مش مجند حد تاني غير داده نعمة ؟
«سليم» بجفاء
ـ كنا مراقبين الكل . لكن هي الوحيدة اللي كشفنالها ورقنا وسالم كلمها و نبهها أنه ممكن يحاول يعمل كدا . مكناش نقدر أننا نستنى لما هو يعمل كدا الأول ، و سالم كان عايز يطمنها . محدش عارف لو مكنش حذرها كان حصل ايه ؟ أو كان رد فعلها هيبقى إيه ؟ الست خسرت جوزها قبل كدا و اكيد مش هتكون عندها استعداد تخسر بنتها أو حفيدتها .
وضعت «شيرين» يدها فوق جبهتها بتعب تجلى في نبرتها حين قالت
_ طب وبعدين ؟ يعني هو كده اكتشف أن دادا نعمة مسلماه لينا ولا ايه ؟ اشمعنى خلى نجيبة هي اللي تعمل كدا ؟
تدخل «سالم» بنبرة جافة
ـ عشان عارف ان نعمة أضعف من أنها تعمل كدا . مهما كان بـ يهددها ، و كمان كان قاصد يضللنا . عشان لو هي مسلماه لينا هو يضرب ضربته بعيد عنها ، و للأسف نجح في دا .
استفهم «مروان» قائلًا
ـ طب دلوقتي نجيبة هربت و دا بيثبت التهمة عليها . مفروض نتصرف مع جوهرة ازاي ؟
«سالم» بجفاء
_ كأن مفيش حاجه حصلت .
برقت أعين الجميع فقال «مروان» باندهاش
_ بس يا كبير احنا كدا …
قاطعه «سالم» بجفاء