تدخل« مروان» مُساندًا لحديث «سليم»
_ انا واثق أن اللي عمل كدا نجيبة . طول الوقت كنا مركزين مع جوهرة و توقعنا أنها هتضغط على داده نعمة عشان تأذي فرح لكن أنها تخلي نجيبه تعمل كدا دا اللي فاجئنا خصوصًا أن مفيش اي حوار حصل بينهم خالص . انا مراقب الاتنين .
شهقت «شيرين» بصدمة
_ دادا نعمة ! و ايه اللي دخل دادا نعمة في الموضوع فهموني ؟
تولى «طارق» الإجابة قائلًا بخشونة
ـ لما هارون وصل القصر شكينا ان في خاين بيساعده من حوالينا بس مكناش عارفين مين ؟ ولما حصل اللي حصل و سالم رماه في الاسطبل طبعًا كنا مراقبينه فبالتالي الخائن دا مش هيعرف يتواصل معاه . فـ توقعنا أن ناجي هيلجأ لحد جوا القصر عشان يتواصل مع جوهرة لأنه طبعًا مش هـ يسيبهم وسطنا كدا من غير ما يستغل دا لصالحه.
«شيرين» باستفهام
_ لحظة واحدة . يعني هو كان قاصد أن هارون ييجي القصر و ماما تعرف بوجوده !
«مروان» بحنق
_ ايوا . كان عايز يضربنا من جوا ، و عشان دادا نعمة هي اكتر حد موثوق فيه بالنسبالنا و الوحيدة اللي من الشغالين ليها كل الصلاحيات في البيت . توقع سالم أنه ممكن يضغط عليها انها تساعده بأنه يهددها بـ بنتها وحفيدتها ،. و خصوصًا أنه معلم عليها قبل كدا ، و كان السبب في قتل جوزها