_ لما بكون مخنوقة أو متضايقة بنزل الشارع اساعد اي حد وقتها برتاح .
و بالفعل قام بتسليم كل المشتريات إلى صاحبة الدار التي قالت بحبور و امتنان
_ شكرًا اوي لحضرتك متعرفش احنا كنا محتاجين للحاجات دي قد ايه ، و خصوصًا حاجات الأكل و الشرب الدار كبيرة ، وللأسف مش كل التبرعات بتغطي متطلبات الأطفال .
«سالم» بخشونة
_ كل شهر هاجي بنفسي اعرف الدار محتاجه ايه و هوفر كل احتياجات ومتطلبات الولاد . أنتِ بس عرفيني ، و دا رقمي خليه معاكِ اوعي تترددي تكلميني في أي وقت .
اغرورقت عيني المرأة بتأثُر تجلى في نبرتها حين قالت
_ مش عارفه اقولك ايه بجد ؟ ربنا يباركلك و يجبر بخاطرك و يحفظلك كل حبايبك .
خرجت كلماته تحمل جمر اللهفة و الألم معًا
_ يارب . ادعيلي الدعوة دي كتير . ربنا يحفظلي حبايبي و يباركلي فيهم .
انتهت المهمة و عادوا إلى المشفى فكان «سالم» صامتًا و قد احترم «مروان» رغبته في الهدوء و لم يتحدث ليتقابل مع كُلًا من «طارق» و «شيرين» التي ما أن رأته حتى تساقطت العبرات من مُقلتيها و خرجت كلماتها مُتقطعه حين قالت
_ سالم . انا مش عارفه اقولك ايه ؟ انا اسفه . احنا كلنا آسفين .
«سالم» بنبرة خشنة
_ متتأسفيش يا شيرين . محدش له يد في اللي حصل دا. انا اللي معرفتش احمي مراتي .