أوشكت على الحديث فلم يُمهلها بل صاح مُحذرًا
_ كل شويه تغضبيلنا بقى . فاضيين احنا . الست الصح متسبش بيت جوزها . اطردي في الشارع . هو ابن حلال و يستاهل انما أنتِ متخرجيش ، و بعدين ابننا ميتعيبش بقى .
«جنة» باندهاش
_ هو انت شويه تقول عنه كلام حلو و شويه تقول عنه كلام وحش . انا اخترت فيك .
«مروان» بجدية زائفة
_ ايوا يا بنتي ما هو ابننا بردك . اي نعم هو كشري ، و دمه يلطش ، و عصبي ، و على طول عاملنا المية و حداشر بتاعته دي ، و بوزه يقطع الخميرة من البيت بس ابننا . يعرنا . نرميه يعني !
_ اوف بقى . بس بردو انا هتشل ازاي يشيل البت دي ؟
مروان بجفاء
_ يابنتي حد يقول للنعمة لا ، و بعدين تعالي هنا . أنتِ كاشفة نفسك كدا ازاي ؟ مش مفروض تداري شويه يا هبلة . متبينيش للراجل انك بتغيري عليه عشان ميتمرعش عليكِ اتعلمي من اختك هتتجلط يا عيني و مش قادرة تفتح بقها .
«جنة» بتفكير
_ تصدق انت عندك حق . ايه دا لحظة واحدة مالها فرح ؟ بعد الشر عنها هو في حاجه انا معرفهاش ؟
«مروان» بتقريع
_ هو أنتِ بقيتي تعرفي حاجه ؟ بقيتي زي قلتك في البيت ، و دا مش عاجبني يا ام محمود . لازم لنا قاعدة . انجري روحي صالحي سلومة الأقرع و تعالي وانا احكيلك .