يعلم أنه هالك لا محالة ولكنه اراد تخفيف وطأة كوارثه قليلاً فقال يدافع عن نفسه
” ناجي اللي خطط لكل حاجه عشان ينتقم منكوا فيا .هو اللي بعتلي ناصر عشان يشربني مخدرات. و هو اللي خلاني افكر في الهروب و هو اللي خطط لحكاية الموت دي و ساعدني فيها و هو اللي كلم الدكتور عشان يديني الحقنة اللي خلت النبض ضعيف جدا عشان لما تشوفوني تتأكدوا أن أنا ميت . و هو بردو فتح القبر بالليل و خرجوني بعد ما جهزلي ورق السفر المزور هو اللي ورا كل حاجه صدقني يا سالم اقسم بالله ما بكذب..”
انهالت الكلمات فوق مسامعه كالحجارة التي تلقاها صدره وهو يناظر شقيقه الأصغر بأعين جاحظة و انفاس محتقنه و قلب منفطر يجيش به شعور قوي من الخزي الذي تبلور في كلماته وهو يقول بقسوة
” مصدقك . وعارف انك مبتكذبش . مع اني بتمني من كل قلبي انك تكون بتكذب . و ان الكلام دا محصلش ..”
اخفض رأسه بخزي من كلمات سالم التي تعري مدي ألمه و صدمته
” مش مكسوف من اللي انت بتقوله ؟ ناجي عمل كل دا و انت كنت فين ؟ عروسة بخيوط بيحركها بإيده؟ “
هكذا تحدث سالم بلهجة مفعمة بالغضب الذي اؤتعب له حازم فحاول تغيير دفة الأمور لصالحه فصاح مبررًا
” نصبلي فخ والله .. و هو اللي رمي البت دي في طريقي … “