فقالت ملك: آه, ما هو الازعاج بتاع النهاردة ممكن يخليه ينام لحد الصبح.
لا يعلم ان كان استخدامها لكلمة ازعاج هو من سبيل المزاح أم أنها حقا لم تستمتع باليوم لذا قال محاولا استكشاف الأمر بطريقة غير مباشرة: بس كان يوم حلو.
فقال ملك مؤيدة: حقيقي كان يوم جميل والفضل يرجع لمرام طبعا.
ثم اتجهت إلى خزانة الثياب وهي تقول: طب انا هروح أغير هدومي بقا لان حاسة اني بجد قربت انام على روحي.
أثناء اختيارها للمنامة التي ستستخدمها اليوم وكانت دائما تنتقي الأكثر احتشاما, سمعته يتحدث من خلفها وقد اقترب صوته منها كثيرا: ممكن تقبلي دي مني؟
التفتت ناحيته لتجده أمامها مباشرة وفي يده علبة صغيرة من القطيفة فسألته دون أن تبدي رغبة في أخذها: ايه دي؟
عمرو موضحا وهو يفتح العلبة لتجده سوار من الألماس جذاب يخطف الأنظار: تقدري تقولي انها تعبير بسيط عن مدى امتناني لكل اللي بتعمليه مع يوسف.
فقالت ملك مترددة: بس أنا………..
فقاطعها عمرو على الفور قاضيا على أي اعتراض قد تتفوه به: أرجوك, لو رفضتي تاخديها, هعتبر ان دة معناه انك لسة زعلانة مني وساعتها هيزيد احساسي بالذنب بسبب اللي عملته معاكي.
ترددت قليلا, ثم مدت يد مرتبكة تتناول منه العلبة وهي تقول: متشكرة.